প্ৰেম নজমেহে নজমে ( তৃতীয় খন্ড)

প্ৰেম পত্ৰ আৰু আৰ্চিচ কাৰ্ডৰ আইডিয়া ফ্লপ হোৱাৰ পিছত লগৰটোৰ কানত ধৰি কচম খালো যে আৰু কাহানিও প্ৰেমত নপৰো ৷ পিছে দিল হে কি মানতা নেহি ....."চাচৌ কি জৰুৰত হে জেইছে জিন্দেগী কি লিয়ে....বছ, এক চনম চাহিয়ে আচিকি কে লিয়ে"...জাতীয় প্ৰেম মুলক গানবোৰ শুনাৰ পিছত আকৌ জৌচ উঠি যায় ৷ ট্ৰেজেদীত চকুপানী বৈ যোৱা কমেও তিনি কুৰি দহটা কবিতাৰ জন্ম দিয়াৰ পিছত ভাবিলো নাই এই কথাই কথা নহয় এই বাৰ হয় ৰঙা মাটি নহয় গুৱাহাটী৷ পাওঁক সেইখিনি সময়তে "ফুল অউৰ কাঁটে" চিনেমাৰ "জিছে দেখ মেৰা দিল ধৰকা, জান তৰপ তি হে, কৌই জন্নত কি বহুৰ নেহি, মেৰি কলেজ কি এক লড়কি হে" গানটো ৰিলিজ ৷ দিল টো এনেও পাগল, তাতে পাঁচ বছৰকৈ ল'ৰা স্কুলত পঢ়ি কলেজত নাম লগাইছো ৷ চেম্পু কৰি মেলি যোৱা দীঘল চুলি, বতাহত উৰি যোৱা চুৰ্ণী, ডালিমগুটিয়া দাঁতৰ মাজেৰে মিচিকীয়া হাঁহি ৷ মুঠতে দিল , বিৰেন একোৱেই কাম নকৰা হ'ল ৷ আফগানিস্থানৰ মৰুভুমিৰ পৰা নি যেন কোনোবাই গোৱাৰ সাগৰৰ পাৰত হে মেলি দিলে ৷ ফিলিং লেন্ডিং অন অমৰাৱতি ৷ বেক পকেটত বহিখন জাপ কৰি ভৰাই পেলুৰ দোকানৰ সন্মুখত চিগেৰেট হুপি যেতিয়া ৰৈ থাকো নিজকে অনিল কাপুৰ, চঞ্জয় দত্ত যেন লগা হ'ল ৷ অ' ৰ'ব, বাকি হিৰো বাদ দি এই দুজনৰ নাম ল'লো যে কাৰনটো কৈ দিও ৷ চুলিৰ পাং ৷ নাই বুজা চাগে নহয় নে? বাৰু, কথাতো হ'ল সেই সময়ত বগা জোটা, আহল বহল জীনচ পেন্ট আৰু নীলা জীনচৰ জেকেটৰ জামানা আছিল ৷ চাজন চিনেমাৰ সঞ্জয় দত্তৰ দৰে পিছফালে বৈ পৰা দীঘল চুলি, অনিল কাপুৰৰ দৰে ব্ৰেক ব্ৰাছ কৰি মাজে মাজে হাতেৰে পাং, বলেত' ঝাকাচ ৷ যি কি নহওঁক, চিনেমা মাফিক খুন্দা খাই কিতাপ খহি পৰা আৰু মই বুটলি দিওঁতে চকুৱে চকুত পৰাত লাজ কৰি তাই দৌৰি যোৱা, আৰু দৌৰি গৈ নদীৰ পাৰত চকু চাঁত মাৰি যোৱা ৰঙা চাৰ্ট বগা পেন্টৰ সৈত্যে ....ধক ধক কৰনে লগা, মেৰা জিয়াৰা ডৰনে লগা টাইপ ৰোমাঞ্চ নহ'ল যদিও ক্লাছৰ এগৰাকীক দেখিলেই "এক লড়কি কো দেখা ত' এইচা লগা, যেইছে" ...গানটো বেকগ্ৰাউন্ডত বাজি থকা হ'ল ৷ নিজৰ ৰোল নম্বৰ পাহৰি দুই এদিন তাইৰ ৰোল নম্বৰতো ইয়েছ চাৰ কোৱা ৰেকৰ্ড বনি গ'ল ৷ বান্দৰ সেনাই মানে লগৰ বোৰে ক'লে প্ৰপ'জ নিদিয় কিয়? কথা মতে কাম ৷ মহাভৈৰৱ মন্দিৰত সেৱা এটি কৰি এদিন মৰনত শৰণ দি চিনাকী হ'লো ৷ পিছে হ'ব কি চিনাকী হে হ'লো ৷ চিনেমাৰ ইন্টাৰভেল ৷ মানে পূজাৰ বন্ধ ৷ হোষ্টেল পৰা কেতিয়া ঘৰ গ'ল গমকে নাপালো ৷ বেকগ্ৰাউন্ডত বাজি থাকিল "জান তেৰে নাম" বোলচবিৰ এই গীতটি ...."কল কলেজ বন্ধ হ' জায়েগা, তুম অপনে ঘৰ ত' জাওগে..ফিৰ এক লড়কা, এক লড়কি চে মিল নেহি পায়েগা"....লগৰ এটাই কিবা কৰি তাইৰ ঘৰৰ লেন্ড লাইন নম্বৰটো আনি দিলে ৷ নিজৰ ঘৰৰ আঙুলি ভৰাই ডায়েল কৰা যন্ত্ৰটোত এচ টি ডি সুবিধা নাই ৷ পিছে সৌভাগ্য ক্ৰমে অসম মুলুকত সেইখিনি সময়ত নতুনকৈ পি চি অ' নামৰ সুবিধাটো নতুনকৈ গঢ় লৈ উঠিছিল ৷ কাগজত নম্বৰটো লিখি নি আবেলি এদিন পিচিঅ বুথত সোমাই ডায়েল কৰিলো
০৩৭১২-২২৩৭২ ৷
ক্ৰিং ক্ৰিং ক্ৰিং ...
সিফালৰ পৰা গলগলিয়া পুৰুষ কন্ঠ ৷
হ'ব লগা শহুৰৰ মাত শুনি ভয়তে ৰিচিভাৰ ষ্টেণ্ডত থেকেচ....
কেৰেচ কেৰেচ কৈ বিলৰ কাগজখন ওলাল ...
সাত টকা ৷
কিছু পৰ ৰৈ উশাহটো ঘনাই টানি আকৌ বুটাম টিপিলো ...
ক্ৰিং ক্ৰিং ক্ৰিং ....
সিফালৰ পৰা একেই গলগলিয়া পুৰুষ কন্ঠ ...
কোনে কৈছে, নাম নকয় কিয়?
সেপটো গিলি মই বোলো খুড়া ৰক্তিম আছেনে?
কোন ৰক্তিম? কোনো ৰক্তিম চক্তিম নাই ৷ ৰং নম্বৰ ...
মই মনতে বোলো হেৰৌ জানো, ৰক্তিম বুলি যে কোনো নাই ৷ ভয়ত কিবাকৈ যে নাম এটা ওলাল সেইটোৱেই বহুত, আৰু ৰং নম্বৰ নহয়, ঠিকেই লগাইছো পিছে কওঁ কেনেকৈ যে মই হ'ব লগা জোৱায়েকে ফোন লগাইছো ? যি হে অমৰীশ পুৰি হেন মাত ৷ তথাপি ডাবৰ শ্ৰৱণপ্ৰাচ নোখোৱাকৈয়ে তেজ মোৰ ডিমাগে ক'লে কিবা সঁচাই ভুল হ'ল নেকি? শ্ৰীদেৱী হেন ছোৱালীৰ বাপেকৰ ওম পুৰি হেন মাত ৷ তাতে ইনফৰমেচন মতে শহুৰৰ নাম ডম্বৰু বৰা , ডম্বৰুৰ মাত ডবাৰ দৰে যে? অলপ ডিমাগটো খটুৱাই পিচিঅ'ৰ ল'ৰা জনক ক'লো দাদা এই নম্বৰটো ডাইৰেক্টৰিত চাই কৈ দিয়কচোন ডম্বৰু বৰাৰ হয়নে?
পাত লুটিয়াই বগৰাই ল'ৰাটোৱে ক'লে ...ৰঙামাটি পুলিচ চকীৰ ......পিছৰ খিনি শুনিবলৈ আৰু ধৈৰ্য ন'হল ৷ পিচিঅ'ত বিলটো দি লগৰটোৰ টেটুৰ জোখটো আৰু চুলি কোচা মনত পেলাই পিচিঅ' পৰা ওলাই আহিলো ......

*********