প্ৰেম নজমেহে নজমে ( পঞ্চম খণ্ড)

তু প্যাৰ হে কিচি অউৰ কা,
তুঝে চাহতা কৌই অউৰ হে....

ৱাহ সঁচাইটো, তাৰ বিৰেন নাই বুলি মই এনেই ভাবি আছিলো, মৰমতে সাৱটি ল'ব মন গৈছিল তাক ৷ যি কি নহওক তু প্যাৰ হে কিচি অউৰ কা তুঝে চাহতা কৌই অউৰ হে ....সুন্দৰ চিটুৱেচনেল গান, মোৰ লগত মিলি গৈছে ৷
গানটো ফিলিপচৰ টেপটোত দুই তিনিবাৰ ৰিৱাইণ্ড ফৰৱাৰ্ড প'জ কৰি কৰি লিখি পেলালো ৷ মুঠতে গামেই ৷ লগৰ দুটামানে ক'লে পাৰিবি জানো? চা ভাই ষ্টেজত আজিলৈকে তই উঠি পোৱা নাই, তাতে তই গানো নাগাৱ ৷ মই বোলো চালামি চিনেমাৰ ডাইলগ টো মনত নাই জানো? .... ইয়ে ইস্ক নেহি আচান, আগ কি দৰিয়া হে অউৰ ডুব কে জানা হে..... চিন্তা নকৰিবি দোষ্ট, গানটো গামেই আৰু তাইকো শুনাম ৷
আৰম্ভ কৰিলো প্ৰেকটিচ ৷এটা হাতেৰে টেপটো কানৰ কাষত ধৰি আনটো হাতেৰে গান লিখা কাগজখন লৈ চিঞৰি চিঞৰি গাব আৰম্ভ কৰিলো ৷ কিন্তু প্ৰব্লেমটো হ'ল যে কেতিয়াবা কুমাৰ চানুৱে মোতকৈ আগতে গাই দিয়ে আৰু কেতিয়াবা মই কুমাৰ চানুতকৈ আগত ধৰো ৷ ভাবিলো কাগজত লিখি লৈ গোৱা বাবে হৈছে ৷ পাৰিম কিয় নোৱাৰিম, জীৱনত প্ৰথম গান জাতীয় কিবা গাইছো, অলপ হ'বই ৷ নিজকে শান্তনাও দিলো আৰু উৎসাহিতও কৰিলো ৷
কমেও এশ ডেৰশ বাৰ টেপৰ লগে লগে গোৱাৰ পিছত কুমাৰ চাণু আৰু মোৰ অলপ তাল মিল আহিল, আই মিন দৈত্য কন্ঠৰ পৰা সমবেত অৱস্থালৈ আহিল ৷ কনফিডেঞ্চ লেভেল বাঢ়িব ধৰিলে ৷ মাজতে দেউতাইও দুবাৰ মান আওৰালে ৷ মায়ে ঘোপাকৈ চোৱাত যেনিবা মনে মনে থাকিল ৷ বুজিলো মোৰ একেটা শাৰীকে বাৰম্বাৰ কৰা ৰেয়াজ শুনি শুনি দেউতাৰো গানটো মুখস্থ হ'লগৈ ৷ যি নহওঁক "ভালেই গাইছ, অলপ শুৱলাকৈ গাবি" বুলি কোৱা দেউতাৰ কথাষাৰক সিমান এটা ৰিয়েকচন নিদিলো ৷
ৰেয়াজ চলি থাকিল ইফালে নৱাগত আদৰণী সভাও চমু চাপি আহিল ৷ কালচাৰেল চেক্ৰেটেৰিক বহু কষ্ট কৰি জিকাই থৈছো, গতিকে ফ্ৰেচাৰ্চত মোৰ গান গাবলৈ পোৱাটো কনফাৰ্ম ৷ ঠান্ডা পানী খোৱা বন্ধ, চিগাৰেট বন্ধ, বাইচেঞ্চ চৰ্দি জাতিয় কিবা লাগি যাব পাৰে বুলি দুদিনমান গা ধোৱাও বৰ্জন কৰিলো ৷
চিন্তা হ'ল ষ্টেজত পিন্ধিম কি? টাইট জিন্চ লেডাৰ জেকেট, ডিঙিত এডাল শিকলী টাইপ চেইন ৷ ওহো,ভাল নালাগিব, ফৰ্মেল পিন্ধিম, ব্লু পেন্ট হোৱাইট টি চাৰ্ট ৷ নাই হাতৰ বাহু দুটা ক্ষীন, টি চাৰ্ট পিন্ধিলে আইনাত মন কৰিছো মোক খেতিৰ মাজত চৰাই খেদিবলৈ টেকেলীটোক চাৰ্টটোৰ সৈতে পিন্ধাই থোৱা মুখ পোৰক টোৰ দৰে লাগে ৷ মিঠুন চক্ৰৱৰ্তীৰ ভক্ত লগৰটোৱে ক'লে গীটাৰ লৈ যদি তই চাৰ্ট আৰু পেন্টত লাইট জ্বলা ড্ৰেচ কৰ' ষ্টেজ হিলি যাব , আৰু মাইক্ৰফ'নৰ শিলৰ মুৰ্তি টাইপ নাথাকিবি, অলপ হাত ভৰি হিলাই থাকিবি ৷ মই বোলো তই "তু প্যাৰ হে কিচি অউৰ কা গানৰ লগত মিলা ডে়ঞ্চ এটাকে প্ৰেকটিচ কৰ,তেতিয়ালৈ মই গানটো হে়ঞ্চৰ লগত ফাইনেল ৰিহাচেল কৰো ৷
কিবৰ্ডত বিকাশ, ড্ৰামত বাবু, গীটাৰত প্লাবন ....ৰিহাচেল চুৰু ৷ ৱান দু ট্ৰি ফ'ৰ ষ্টাৰ্ট ...তু প্যাৰ হে কিচি অউৰ কা.......
ষ্টপ,
প্লাৱনে ৰখাই দিলে,
বোলে অফ বিট কিয় ধৰ', বিটৰ লগত গা ৷
মই থোলোকে বিট কি অফ বিট কি বুজি পালেহে ৷
চা ৰে গা মা পাই নে চাৰে গাই নাপাই তাকেই নাজানো ৷ তথাপি গাম, প্ৰেকটিচ মেকচ এ মেন পাৰফেক্ট, নিজকে ক'লো পাৰিবি তই ৷
ৱান দু ট্ৰি ফ'ৰ ষ্টাৰ্ট ......তু প্যাৰ হে কিচি অউৰ কা...
ষ্টপ,
এইবাৰ কি হ'ল? মোৰ প্ৰশ্ন
বিটটো ধৰ, বিটতো ধৰ, প্লাৱনে চিঞৰি থাকিল ৷
মই বোলো এই বিটটো থাকে ক'ত ? তাক ক'ত ধৰিব লাগে গম পালেহে ধৰিম মই ?
প্লাবনে মূৰটো খজুৱাই বোলে এনেকৈ নহ'ব, এটা কাম কৰ, তই ক'ত ধৰিব লাগিব মই ইংগিত এটা দিম , তই ষ্টাৰ্ট কৰিবি ৷
ৱান দু ট্ৰি ফ'ৰ ষ্টাৰ্ট ...টিং, টিং টিং তিনি নম্বৰ টিং টোত তই তু টো ষ্টাৰ্ট কৰিবি ৷ কথা মতে কাম ৷ টিং টিং, টিং ....তু প্যাৰ হে কিচি অউৰ কা ৷ প্লাবনে ক'লে বঢ়িয়া, এইবাৰ বিটত পৰিছে ৷ মনটো ফৰকাল লাগিল ৷ হওঁক তেওঁ ক'তো গান গাবলৈ নিশিকাকৈ, বিট কি বস্তু নুবুজাকৈ যে বিটত গাব পাৰিছো ৷
টিং টিং, টিং ....তিনি নম্বৰ টিং...তু প্যাৰ হে কিচি অউৰ কা ...দিনটো প্ৰেকটিছ কৰি কৰি আই মিন বেবাই বেবাই আবেলিলৈ কোৱাৰিৰ কিনাৰেদি বগা থু ওলাব ধৰিলে ৷ প্লাবনে লগৰ কেইটা লগত কিবা এটা ডিচকাচ কৰি ক'লে বোলে হ'ব আমি তোৰ লগত ৰিডম মিলাম, তই মুঠতে গাই যাবি ৷ অলপ মিউজিকৰ চাউণ্ড বেছি দিব লাগিব, ড'ন্ট ৱ'ৰি আমি মিলাম, তই কেৱল মাইক্ৰফ'নটোৰ পৰা অলপ মুখ খন দূৰৈত ৰাখি গাবি ৷
প্ৰেকটিছ শেষ হ'ল, ৰাতি বিচনাতো কিবা লাইন খেলি মেলি হ'ব পাৰে বুলি মনতে আওৰালো ৷ নাই সকলো ঠিকে ঠাকে আছে ৷ এতিয়া গালেই হ'ল ৷
ফ্ৰেচাৰ্চৰ দিনা পুৱাৰে পৰা ঘনাই বাহিৰলৈ যোৱাৰ টেণ্ডেছিটো দেখি অকন প্ৰেচাৰটো বহা যেন লাগিল ৷ যি কি নহওঁক গ্ৰীণৰুমত নিজকে কুল ৰাখিলো ৷ মনতে আওৰাই থাকিলো তু প্যাৰ হে কিচি অউৰ কা ৷ নাই চব ঠিকে আছে ৷ এইবাৰ মঞ্চত আমি নিমন্ত্ৰন জনাইছো প্ৰথম বাৰ্ষিকৰ ছাত্ৰ....
নিজৰ নামটো শুনিবলৈ হে পালো ....

গানটো কি আছিল ?....

তু প্যাৰ কা অউৰ কা কিচি কা হে ...

তু কিচ কা প্যাৰ হে .........

তু অউৰ কা প্যাৰ হে .....

ধেই কিবা খেলি মেলি লাগিব ধৰিলে ......

গিটাৰ টুং টুং টুং......

হাত নে ভৰি কঁপিছে নে ষ্টেজটো কঁপিছে ঠিক আইডিয়া কৰিব নোৱাৰিলো......
ষ্টেজত মই,
মাইক্ৰফ'নটোৰ ষ্টেণ্ড ডাল অলপ ওখ কৰি মোৰ মুখৰ আগত এটাই লগাই দি গ'ল ৷ সন্মুখত প্ৰতিটো মানুহৰ দুটাকৈ চকু হ'লেও কমেও হাজাৰ বাৰশ চকুৱে মোৰ মুখলৈ চাই থকা যেন লাগিল ৷
মই এবাৰ কাগজ খন চালো, গানটো লিখি অনাখন আকৌ হয়নে নহয়, ইয়াত চোন একো লিখা নাই ৷
টেনচনত প্লাৱনলৈ চালো
টিং, টিং,টিং,তিনি নম্বৰ টিং
কঁপনি ধৰা হাতেৰে কাগজ খন লুটিয়াই চালো , দেখিলো গানটো আছে....
টিং টিং,টিং
সন্মুখৰ শাৰীতে দেখোন তাই ........কাষত কেমেষ্ট্ৰী ডিপাৰ্টমেন্টৰ চিনিঅৰটো ৷ উমি উমি জ্বলি থকা অন্তৰৰ জুই কুৰা দাউ দাউ কৈ জ্বলিব লাগিল ৷ মিউজিকলৈ নৰখিলোৱেই ...তু প্যাৰ হে কিচি অউৰ কা, তুঝে চাহতা কৌই অউৰ হে .....
কন্ঠত বেদনা, সুৰ তাল মান সকলো নাজানো কিবাকৈ মিলি পৰিল ৷ জাউৰিয়ে জাউৰিয়ে হাত চাপৰি ৷ নিজকে সেই মুহুৰ্তত আমিৰ খান যেনেই লাগিছিল ৷
সন্মুখলৈ চালো, তাইক নেদেখিলোঁ, ভিলেইনটোও নাই ৷ ষ্টেজৰ পৰা নামি আহিলোঁ ৷ "খুব ধুনীয়া গালা, ভাল লাগিল" .......গ্ৰীনৰূমৰ ভিতৰত মোৰ বাবে ৰৈ থাকি মোক হাত আগবঢ়াই শুভেচ্ছা দিয়া গৰাকী আন কোনো নহয়, তাই আছিল ৷ "পূজাত মই ঘৰত থাকোতে তুমি বোলে আমাৰ ঘৰৰ নম্বৰ বুলি বহুতলৈ ৰং নম্বৰ লগালা, তোমাৰ লগৰ জনে ক'লে ৷ এইটো লোৱা, কালিলৈ পুৱা মই ঘৰলৈ যাম ৷ ফোন কৰিবা"
হাত টো আগবঢ়াই দিলো ৷ হাঁহি এটা মাৰি তাই আতৰি গ'ল ৷ পিছফালৰ পৰা লগৰটোৱে আহি মোক গবা মাৰি ধৰিলে.........
ষ্টেজত কোনোবাই গাবলৈ আৰম্ভ কৰিছিল ...
তু মিলে....
দিল খিলে ...
অউৰ জিনে ক' কিয়া চাহিয়ে............

********