প্ৰেম নজমেহে নজমে (চতুৰ্থ খণ্ড)

আগৰ খিনি একেই ৰাখ, মাত্ৰ শেষৰ সংখ্যাতো সলনি কৰি কৰি চা চোন ডায়েল কৰি ৷এবাৰ ০, এবাৰ ১ এনেকৈ ৯ লৈকে ৷ তাইৰ ঘৰত চিঅ'ৰ এটাত লাগিবই লাগিব মই জানো ৷ আগৰ খিনি নম্বৰ কাৰেক্টেই আছে, হয়তো লাষ্ট নাম্বাৰটো কিবা ভুল কৰিলো লিখোতে ৷ লগৰটোৰ কথামতে ট্ৰাই কৰিলোঁ ৷ নাই সকলোৰে কেবল এটাই উত্তৰ "ৰং নাম্বাৰ" ৷
"এইবাৰ শেষৰ সংখ্যাৰ লগত তাৰ আগৰ সংখ্যাবোৰো সলনি কৰি ট্ৰাই কৰ", লগৰটোৰ উপদেশ ৷ কথাষাৰ শুনিয়েই তাৰ কানৰ তলত প্ৰকাণ্ড কানতলীয়া এটা মাৰি দিব মন গৈছিল কিন্তু হাজাৰ হওঁক দোষ্ট হয়, সম্বৰণ কৰিলো ৷
সি আকৌ টুপুককৈ মাত দিলে "তোৰ লাকি নম্বৰ কিমান" ? মই বুজিলো সি মোৰ লাকি নম্বৰ ট্ৰাই কৰি ফোন নম্বৰ বনাব ৷ খংটোৱে চুলিৰ আগ পাইছিল গৈ, পিছে উশাহটো দীঘল কৈ লৈ নমাই আনিলো ৷ মই বোলো থ, মগজুটোক তোৰ ইমান কষ্ট নিদিবি, কুকুৰ গৈ পানীত পৰা আইডিয়াৰ ভৰ সহিব নোৱাৰি কুটুক কৈ মগজুটো তোৰ ডিঙিৰ পৰা খহি পৰিব কোনোবা দিনা ৷

পূজাৰ বন্ধ তেনেকৈয়ে পাৰ হ'ল ৷ কলেজো খুলিলে কিন্তু মোৰ পেৰেম কাহিনী ঠেলিলেও আগ নবঢ়া হ'ল ৷ মাজতে ভুতৰ ওপৰত দানৱ পৰা দি ক'ৰ পৰা কেমেষ্ট্ৰী ডিপাৰ্টমেন্টৰ চিনিয়অৰ এটাই "ডৰ" চিনেমাৰ চাহৰুখ খানৰ দৰে " যাদু তেৰি নজৰ, খুচবু তেৰা বদন, তু হা কৰ য়া না কৰ ...তুহে মেৰি কিৰন, তুহে মেৰি কিৰন " টাইপত ভিলেইনৰ দৰে অনাধিকাৰ প্ৰবেশ কৰিলে নাজানো, মই প্ৰেমৰ প্ৰস্তাব দিম দিম বুলি মুখ মেলি থাকোতেই গ'ল ৷
লগৰটোৱে ক'লে তোৰ দ্বাৰা নহ'ব, আগত মহাবিদ্যালয় সপ্তাহ আহি আছে , তাৰ আগতে কিবা এটা কৰ ৷ কথাটো শুনিয়েই "আজ কলেজ কা আখৰি দিন হে ......গীটাৰ লৈ আমিৰ খানে গোৱা "পাপা কেহতে হে বৰা নাম কৰেগা" শীৰ্ষক গীতটোলৈ মনত পৰি গ'ল ৷ গানটোত আমিৰৰ কাৰনে কলেজৰ ছোৱালীবোৰে পগলাৰ দৰে চিঞৰা খিনি কানত বাৰে প্ৰতি বাজিব ধৰিলে ৷
কলেজ ফাংচনত গান গাম ৷ মই লাহেকৈ ক'লো৷
চকু দুটা বহল কৈ মেলি, কি???? বুলি লগৰটোৱে জোখতকৈ বেছিকৈ মুখ খন মেলি দিলে ৷ তই আৰু গান? ?? তই স্কুলৰ প্ৰাৰ্থনাটোও সুৰত গাই নাপালি গানটো দুৰৈৰ কথা আৰু ষ্টেজত গান গাবি?
মই বোলো চাই থাক, ষ্টেজ হিলাই দিম, তহঁতে মাত্ৰ তলৰ পৰা আৰু এটা আৰু এটা চিঞৰিবি, বাকী মই মেনেজ কৰিম ৷
কিন্তু গাবি কি? লগৰটোৰ প্ৰশ্ন
মই বোলো জুবিনৰ "দুৰে দুৰে থাকিবা কিমান আৰু....গীতটো নতুনকৈ মাৰ্কেটত আহিছে আৰু হিট' হৈছে, সেইটোৱেই গাম ৷
কথা মতে কাম, কলেজৰ পৰা আহোতে টাউনৰ পানীঘৰৰ কাষত থকা ৰফিকৰ দোকানৰ পৰা জুবিনৰ "দুৰে দুৰে গানটো ব্লেংক কেচেটত ৰেকৰ্ডিং কৰাই আনিলো ৷ আহিয়েই ঘৰত ৰিয়াজ ষ্টাৰ্ট ৷ দুৰে দুৰে নামৰ প্ৰথম শাৰীটো পাঁচ ছয় বাৰ গোৱাৰ পিছত টেটুটো কিবা চেৰচেৰাই গ'ল ৷ ইম্মান টান বুলি ভৱাই নাচিলো ৷ অনামিকা আৰু মায়াও দুই এবাৰ গাই চালো, নাই, মায়া বুলি টানিব ধৰিলে মাতটো শেষৰ ফালে নুফুটা হৈ যায় ৷ গানটোৰ বহু ঠাইত উশাহ ঘুৰাই নাপাই মৰি যাম যেন লাগে ৷
লগৰটোৱে বোলে হেৰৌ এই বোৰ হ'ল হাই পিটচ গান, তোৰ টেটুৱে ল'ড লব নোৱাৰিব ৷ তই "মানুহে মানুহৰ বাবে যদিহে অকনো নাভাবে, ভাবিব কোনেনো কোৱা " গীতটো টো এবাৰ ট্ৰাই মাৰ, তোৰ চিটুৱেচন লগতো মিলিব ৷ এফালৰ পৰা কিশোৰ, মঃ ৰফিৰ গানবোৰো মনত পেলালো ৷ নাই মোৰ মাতত চুইট নকৰে ৷ লগৰটোৱে বোলে তোৰ চিটুৱেচন মিলা গান পাই গ'লো, আমিৰ খানে গোৱা , টামাম মিলিব ৷
তু প্যাৰ হে কিচি অউৰ কা, তুঝে চাহতা কৌই অউৰ হে..........
*********