ফেকবুক ডট কম

আমাৰ ঘৰত ভাড়া লৈ থকা দেবুদাৰ কথা কৈছো ।দাদাক আজি কালি ফেচবুক পালে একো নালাগে । অফিচত বোলে এদিন ফেচবুক একাউন্ট নথকা কাৰনে কোনোবাই হাঁহিলে, পিছদিনাই চেকেন্ডহেন পিচি এটা আৰু ডংগল এটা কিনি আনি মোক পাচপৰ্ট ফটো তিনিকপি আৰু ড্ৰাইভিং লাইচেন্চ খন দি বোলে দে একাউন্ট খুলি ।

বহু শিকাই বুজাই যোৱা তিনি মাহত দেবুদাক পৈনত কৰি পেলালো ।আগতে সন্ধিয়া হ'লেই সীতাৰামৰ দোকানৰ সন্মুখত থকা চিৰিজ গছৰ তলৰ বেঞ্চখনত গৈ আড্ডা দিছিল, নামঘৰ গৈছিল বা দত্তৰ ঘৰত ৰম- ৰামি কৰিছিল ৷ পিছে আজি কালি সকলো এৰিলে, এতিয়া কেবল ফেচবুক....এনিটাইম অনলাইন ।বন্ধুবৰ্গ প্ৰায় এৰিছে বুলিয়ে ক'ব পাৰি ।নেৰিবনো কেলৈ সন্ধিয়া হ'লেই যি কেইটাই আড্ডা দিছিল আজিকালি সকলো ফেচবুকতেই ব্যস্ত । দেবুদাৰ সন্ধিয়াৰ ফুৰ্টিপানিকন আগতে দত্ত বা কলিতাৰ লগত একেলগে বহি খাইছিল ।পিছে দত্তও আজি কালি ফেচবুকৰ এজন চেলিব্ৰেটি, ৫ টা মান গ্ৰুপৰ এডমিন।আমাৰ খাদৈচূক গাঁওৰ গ্ৰুপৰ পৰা ওলোৱা মেগাজিন খনৰো এডিটৰ, গতিকে টাইম দিব নোৱাৰা হ'ল ।আজি কালি তেঁওলোকে কাষৰ ঘৰৰ হলেও ফেচবুকৰ দ্বাৰাই ভাবৰ আদান প্ৰদান কৰে।

সিদিনাখনৰ কথা দেবুদাই পিচফালৰ খিড়িকি খন খুলিদি দত্তক চিঞৰিলে, বোলে অ’ দত্ত অফলাইন যে?বৌৱে বোলে হেৰি হাত ভৰি কেইটা ধুই লুঙি খন পিন্ধি লওঁকচোন প্ৰথমে ।বজাৰৰ পৰা আহিয়ে কাপোৰ জোৰ নোখোলাকৈয়ে তিতা দাহে বহি দিলে যে পিচিৰ সন্মুখত ? দাদাই বোলে ৰ’বাহে, বাটত বৰুৱাক লগ পাইছিলো কিবা স্টেটাছ এটা দিছে, মই শুধিলো, নক’লে বোলে নাই নঁকও,কৈ দিলে এটা কমেন্ট কমি যাব।তাকে চাঁও, সি বেটাইনো কি স্টেটাছ দিছে ।

ফেচবুক অন কৰি দেবুদাই পেগটো বাকি ল’লে। এনেটে সুনিল দত্ত নামৰ সেউজীয়া লাইট টো ছাত বস্কত জ্বলি উথিল । দেবুদাই লগত লগত মেচেজ দিলে “ছিয়েৰ্চ”।

টং:
ক্লিক এটা কৰি দেখিলে “ছিয়েৰ্চ”.... বচ দেবুদাই এক ঘোট গিলি দিলে ।ওচৰতে চানাচুৰ খিনিৰ কাৰণে বোন্দাপৰ দি থকা দেবুদাৰ তিনি নম্বৰ সম্পত্তিটোৱে বোলে দেতা দেতা মইও খাম । দেবুদাই তাৰ হাতত চানাচুৰ কেইটামান দি বোলে ধ্যেৎ এইয়া মই ঔষধহে খাইছো ।যা মাৰে মাছ ভাজিছে সেইয়া খা গৈ ।বেটাই বোলে নাই মইও ঔষধ খাম মোও চদি হৈ আছে ।হে হৰি বোলো হেৰা এইটোক নিলানে ওচৰৰ পৰা ।
টং:
চচমা যোৰ কপালত উঠাই মুৰটো সামান্য মনিটৰৰ ওচৰলৈ নি দেবুদাই পঢিলে “আজি লগত এঁও বনোৱা চিকেন আছে, তোমাৰ কি?” দেবুদাই বোলে ইচ বেটা ফাঁকি দিবলৈ জেগা নাপালি? উদৰ সাত পুৰুষ গ'ল কেচা মাছ খাই তই টনিকৰ লগত চিকেন খাইছ? কি বৰ্ডখনত বগলীয়ে মাছ বিছাৰি ফুৰাৰ দৰে আখৰবোৰ বিছাৰি বিছাৰি টাইপ কৰিলে “বন্ধু চিকেনৰ ফটো এখনকে আপল’ড কৰি দিয়ক” ।
নাই ৰিপ্লাই নাই । বেটা মোক বুৰ্বক বনাব আহে, চিকেনৰ ফটো বিছাৰি খুব গুগুল চাৰ্চ কৰি আছে চাগৈ । চানা অলপ মুখলে গলিয়াই দি লুঙিত হাতখন মচি মাউচটোৰে ফেচবুকৰ হ’ম বুটামটো টিপি দিলে ।এনেই দুই এটা স্টেটাচত লাইক মাৰি বৰুৱাৰ স্টেটাচটো পঢ়িব ধৰিলে । ধ্যেৎ বৰুৱাই আকৌ কেতিয়াৰ পৰা কবিতা লিখিব পৰা হ’ল? নামঘৰৰ বছৰেকীয়া সম্পাদকৰ প্ৰতিবেদনখনো চালা মোৰ হঁতুৱাই লিখাই সি আজি কবি হৈ গ’ল? কমেন্ট নিদিলেও নহয় ৰাষ্টাত লগ পাই নিজেই কৈছে আৰু তাতে বৰুৱা নামৰ সেউজীয়া লাইটটোও ছাত বস্কত ট ট কৰি জ্বলি
আছে । বৰ মস্কিল তথাপি ওপৰৰ কমেন্ট এটা কপি পেষ্ট কৰি (y)এটা মাৰি দিলে

টং:
দত্তৰ মেচেজ : মোৰ ম’বাইলৰ পৰা ফটোখন আপল’ড কৰিব পৰা নাই ।দেবুদাই বৌক মাত লগালে বোলো হেৰা দেখিছা দত্তৰ ফাঁকি কেনেকৈ ধৰা পেলালো । ভিতৰৰ পৰা বৌয়ে মাত লগালে বোলে দত্তক বাদ দিয়া দত্তনি আৰু এখোপ চ'ৰা ।দত্তনিয়ে দিয়া পোষ্টবোৰ ইমান লাইক হয় যে কাৰনটো কি জানেনে নাই? সিদিনাখন সিঁহতৰ মাজনীয়ে ক'লে বোলে দত্তনিৰ কমেও ২০ টা মান ফেক একাউন্ট আছে ।লাইক যদি কম হোৱা যেন পাই সেইবোৰ একাউন্টৰ পৰা লাইক মাৰি দিয়ে ।বাৰু বাদ দিয়া তোমাৰ শাহুৱেৰে ৰাতিপূৱা দিয়া গুদমৰ্নিং টেগটো চাগে তুমি লাইক মৰাই নাই চাগৈ, মাৰি দিয়া আৰু যা তা কমেন্ট নামাৰিবা ।
ধ্যেৎ সকলোৱেটো টেগায়েই শাহু বুৰিয়েও নেৰে।বাহ ফটোখন ২০ টা মানক টেগ কৰিছে। হাইদ ফ্ৰম টাইমলাইন কৰিব লঁওতেই

টং:
মেচেজ এটা আহিল, খুলি চাই দেখে সদা গগৈৰ
গগৈৰ মেচেজ: হালৈৰ ঘৰটে থকা পেহীয়েকজনিৰ টান পৰ দব লাগিব। এই মাত্ৰ আপদেট দিছে ।আপুনি আনফ্ৰেন্ড কৰি থৈছে বুলি জানি মেচেজটো দিলো । হালৈক ৰিপ্লাই এটা দিব হাজাৰ হলেও একে গাঁওৰে মানুহ ।
দেবুদাই আকৌ খেপিয়াই খেপিয়াই লিখিব ধৰিলে “ পৰ দিব যাবা নেকি? মই ১২ টা ১ টা মানলৈকে ফেচবুকত অনলাইনহৈ পৰ দি থাকিমেই ।কিবা হ’লে মেচেজ এটা
দিবা”

টং টং টং:
জুনমনিৰ নটিফিকেশ্চন : জোনমনি শইকীয়া এডেড এ লাইফ ইভেন্ট টু হাৰ টাইম লাইন “কম্প্লিকেটেড ৰিলেশ্চন টু চিংগেল এগেইন”

দেবুদাই চিঞৰি বোলে জোনমনি তই পঢ়া নাই, আকৌ ফেচবুক খুলিছ, ৰ’ গৈ আছো

ফেকবুক ডট কম............. (২য় খন্ড)

এলেন শ্বেলী , দেবুদাৰ ডাঙৰ লৰাটোৰ ফেচবুকিয়া নাম ,এনেই নাম লিলাধৰ শইকীয়া, মই মৰমতে লিলাই বুলি মাতো ।ফেচবুকত লিলাই ভাল কবি বুলি এটা নাম আছে ৷ প্ৰকৃততে লিলাইৰ সৰুৰে পৰা কবিতাৰ লগত সম্বন্ধ আছিল । কবিতা মানে কেঁওতৰ সৰুজনী ।কবিতাৰ নামতে লিখিছিল জীৱনৰ প্ৰথমটো কবিতা, শীৰ্ষক আছিল “অ’ কবিতা অ’ কবিতা মোক ভাল নাপাঁও কিয়? সকলোৰে অগোচৰে লিলাইৰ প্ৰতিভা বিকাশ হবলৈ ধৰিলে ।স্কুলত অসমীয়া কবিতাৰ সাৰাংশ পৰীক্ষাত “দাস আৰু ভূঞা” ৰ মকৰধচ খনৰ পৰা পুৰিয়া বনাই হুবহু কপি পেষ্ট কৰিছিল আৰু পিচলৈ প্ৰেয়সীলৈ দিয়া চিঠিতো লগৰ দুই এজনৰ পৰা ধাৰ কৰি অনা দুশাৰী ৷ কবলৈ গলে লিলাইৰ লিলা অপাৰ ইন চৰ্ট শ্ৰীকৃষ্ণৰ সৰু সংস্কৰণ ।মেট্ৰিক পৰীক্ষাৰ এচ এম এচ যোগে ৰিজাল্ট লবলৈ দেউতাকে আনি দিয়া ম’বাইলটোৰ জহত ফেচবুক ৰাজ্যত প্রবেশ কৰিলে ।ফেচবুকৰ এঞ্জেল বোৰ দেখি লিলা অবাক্টেড, বোলে ইমান দিন ক’ত আছিলো ? ইয়াত দেখোন বুটাম টিপিয়েই গাৰ্ল ফ্ৰেন্ড বনাব পাৰি আৰু বুটাম টিপিয়েই ব্ৰেক আপো কৰিব পাৰি । ইমান সুবিধা ।এনেই মিছাতে গাঁওৰ কেইজনিৰ নামত সময় খৰছ কৰিলো ।প্ৰথম অবস্থাত লিলাই আও ভাও বুজি পোৱা নাছিল । দুমাহ মানলৈকে ছোৱালী বুলি ফেক একাউন্টৰ ল’ৰা বোৰকে প্ৰপ’জেল দিলে । লাহে লাহে লিলাই বুজি পোৱা হ’ল । ষ্টাৰ্ট কৰি দিলে বিৰহৰ “কবিতা” । পিছে ডেইলী কবিতা লিখে কি দৰে ? বহু ভাবি গুনি চৰ্ট কাট আইডিয়া এটা উদ্ভাৱন কৰিলে । কপি পেষ্ট ....পিছে আজি কালি ডাইৰেক্ট কপি পেষ্টও নকৰে মডিফাইহে কৰে ৷ আনৰ কবিতাত নিজৰ কেইটামান শব্দ বা শাৰী ।আৰু মা কচম এনেকুৱা কবিতা ৰান্ধে মানে লিখে যে প্ৰকৃত কবিজনেও দুখ কৰে ৷ লিলা লাহে লাহে পৈনত হৈ উথিল কিন্তু এতিয়াও বায়েক জোনমনিৰ কাষ চাপিব পৰা নাই ৷
টং:
ফিলিং ল’নলি…….এফ বি ইছ চ’ বৰিং…জোনমনি শইকীয়া ইচ ইন হাৰ বেড

টং টং টং টং টং টং টং টং টং টং টং টং টং টং
( জোনমনি অনলাইন মানেই মেচেজৰ ধুমুহা)

মানসদা মোৰ নেট পেক শেষ হ’ব হৈছে,পিছত
লগ পাম বাই......
টং.....
প্ৰবাল প্লিজ ড’ন্ট লাই, কালি কলেজত প্লাবিতাই মোক নিজে কইছে তুমি তাইক প্ৰপ’জেল দিয়া কথা ।আৰু প্লিজ মই এনেও তোমাৰ লগত আগতেই ৰিলেশ্চন ব্ৰেক আপ কৰিছো, মই তোমাক তেনেকুৱা বুলি কেতিয়াও ভবা নাছিলো । চ’ প্লিজ স্পেয়াৰ মি, বাই, এন্ড ড’ন্ট মেচেজ মি এগেইন..........
টং....
থেংক কিউ মানসদা, ইউ আৰ চ’ চুইট এন্ড কেৰিং ৷ পিছে নেট পেক মই ভৰালো হয় ৷ ইমান নেট নকৰোৱেই মই ৷
টং.....
বন্দিতা, তোৰ লগত পিছত কথা পাতিম হা,বাই.....
টং....
ছৰি হা বিকি, মেচেজ দিওতে দেৰি হৈ গ’ল,মাৰ লগত চিৰিয়েল এখন চাই আছিলো ।কিয় তেনেকৈ ভাবা? ইউ আৰ মাই জান ডেয়াৰ....ধ্যেত নিলাজ........
টং.....
নাই মানসদা, লগৰ ছোৱালী এজনীৰ লগত পঢ়া কথা ডিচকাচ কৰি আছিলো ।

অ’ই বন্দিতা “প্ৰিন্স কৃষ্টেল বৰা” বুলি প্ৰফাইলটো চা, সি মোক প্ৰপ’জেল দিছে জান’ ? অই বাই হা সি অনলাইন হৈছে ।বাই হা.......

টং .......
অ' মনত পৰিল দেবুদা আৰু বৌৰ কথা কবলৈ পাহৰিছিলোৱেই ৷ দেবুদাও পিছ পৰি থকা ভকত নহয় দেবুদাৰো ফ্ৰেন্ড ফলৱাৰ হাজাৰৰ ওপৰত ৷ দেবুদাহঁতৰ পুৱা আৰম্ভ হয় ফেচবুকৰে আৰু দিন শেষো হয় ফেচবুকৰে ৷ সৌ সিদিনাৰ কথা কাউৰী পুৱাতে বৌৰ ডাক পৰিল ৷
হেৰি উথিলেনে ? ৫ বাজিবৰে হ’ল, উথক সোনকালে, দত্তই চাগৈ “গুদ মৰ্নিং” ষ্টেটাছ দিলেই ৷ বৌৰ মাতত খক মককৈ সাৰ পাই দেবুদাই চিধাই গৈ পিচি অন কৰিলেগৈ । ফেচবুক অন কৰি দেবুদাই বোলে, হেৰা ঠিকেই হে দত্তই দিলেই ৷ হাতত দাদাৰ কাৰনে টুথপেষ্ট লগাই অনা ব্ৰাছডাল দি বোলে আপোনাৰ দ্বাৰা ন’হব আৰু ৷ আনে “গুদ মৰ্নিং, গুদনাইট” দিলে সকলোৱে কমেন্ট দিয়ে আপোনাক কলিতানী জনীৰ বাঢ়িৰে আন কোনোবাই দিয়েনে?দেবুদাই বোলে হেৰা কলিতানীক মাজলে কিয় টানিছা বৌয়ে বোলে
মই টনা নাই , আপুনিহে টানিবলৈ চেষ্টা কৰি আছে ।মই জানো নহয় আপুনি ৰাতি দুপৰলৈকে ফেচবুকত কি কৰি থাকে। হু হু উ ও (চাদৰৰ আচঁলেৰে চকু মোহাৰি মোহাৰি) মই ভাবিছিলো মানুহটোৰ ইমান কষ্ট, ৰাতিও অফিচৰ কাম কৰি থাকে, পিছে কালি
আপুনি অফিছ যোৱাৰ পিছত ফেচবুক খুলিহে গম পাইছো কলিতানিৰ লগত ৰাতি ৰাতি কি লিলিমাই কৰি থাকে ।দেবুদাই বোলে আহ নাকান্দিবাচোন,ৰাতি “গুদ নাইট” মেচেজদি ১২ বজালৈকে লাইক কমেন্ট আহিব আহিব বুলি বোন্দা পৰ দি থাকো ।মনিটৰটোলে
চাই চাই ,ৰিফ্ৰেছ মাৰি মাৰি এনেই কিমান বহি থাকিম? কলিতানিও অনলাইন থাকে সেয়ে অলপ কথা পাতো আৰু । কথা পাতিলেই মানুহ বেয়া নহয় নহয় ৷ বৌয়ে বোলে বেয়া নহয় জানো কিন্তু আগৰ নামলৈ যাওতে ধুতি পাঞ্জাবীৰ সৈত্যে উঠা প্ৰফাইল ফটোখন সলাই ল'ৰাৰ বাইকত জীনচ স্পৰ্টিং পিন্ধা ফটোখন দিবলৈ কিহে পাইছিল ৷ দিছে দিছে কলিতানীক টেগ কিয় কৰিছে? মইও বুজি পাও ৷ দেবুদাই বোলে হেৰা এই ফেচবুক আমাৰ ঘৰলৈ অহাৰ পৰা তুমি বৰ সন্দেহবাদী হৈছা ৷ বৌয়ে বোলে নহম কিয়, আগৰ ঘৰৰ কথা ঘৰত আছিল ফেচবুক অহাৰ পৰা ঘৰৰ চাহ ভাত খোৱাৰ পৰা দুপৰীয়া ৰাতি কি খাইছা , কি পিন্ধিছা, ক'ত গৈছা সকলো ৰাজহুৱা হয় যে ৷ দেবুদাই ব্ৰাচ ডাল হাতত লৈ বাহিৰ পালেগৈ ৷
টং:
বাথৰুমত থকা বৌক দেবুদাই চিঞৰিলে“হেৰা তোমাৰ গা ধুওতে ইমান টাইম লাগেনে ।ইমান সময়ত
মই ১০ বাৰ গা ধুব পাৰিম ।শাহুৱে মেচেজ এটা দিছে কিবা “অল আচাম ফেচবুক এচ’চিয়েচন” বুলি গ্ৰুপ
এটা খুলিছে আমাৰ “অনলাইনখাদৈ চূক”ৰ গ্ৰুপটোৰ সকলোকে এড কৰাই দিব কৈছে ।এপাক ঘৰে ঘৰে গৈ কৈ আহোগৈ নেকি? বৌয়ে ভিতৰৰ পৰা বোলে যাওক যাওক, এই চেগতে এবাৰ গাঁওৰ মানুহখিনিকো ফেচ টু ফেচ লগ পোৱা যাব,অ’ আৰু শুনক হাজৰিকানিক মই কৈছো বুলি ক’ব বোলে আমাৰ “হৰি কীৰ্তন কৰো আহক” পেজত আজি কালি লাইক কমেন্ট নকৰা হ’ল যে ? এটা লাইক বা কমেন্ট ১০টা আশিৰ্বাদ আৰু এটা শ্বেয়াৰ ১০ খন শৰাই দিয়াৰ তুল্য বুলি কৈ দিব । মানুহজনীয়ে একদম ধৰ্ম কৰ্ম নকৰা
হ’ল ।বেছি কিবা ক’লে ক’ব বোলে আমাৰ ঘৰতো ৫ টা একাউন্ট আছে ।দেবুদাই হ’ব দিয়া মই সাউতকৈ গৈ আহো বুলি ওলায় গ’ল।

হৰ এক ফ্রেন্ড জৰুৰী হ’তা হে::

দেবুদাৰ ম’বাইলৰ ৰিং ট’নটোৱে মোক ধৰ মোক ধৰ বুলি চিঞৰিব লাগিল । সিফালৰ পৰা বৌ৷ বৌয়ে বোলে হেৰা আজি কচু আৰু কলডিলৰ আচাৰ বনাই ফটো আপলড কৰিছিলো ৷ টামাম লাইক কমেন্ট ৷ সিফালৰ পৰা দেবুদাই বোলে মোৰ পষ্টত কিমান ৷ বৌয়ে বোলে অথনি চাওতে দুশ হৈছিল ৷ দাদাই বোলে দেখিছা শাওন মাহ চলি আছে তাতে সোমবাৰ, মই জানি শুনিয়ে শিৱ বাবাৰ ফটো দিছিলো,আৰু তাতে “দেখতেহি লাইক ক’ৰো নেহিটো পাপে চুয়েগা” বুলি এনেই লিখি দিছো নে .........

*******