কেছ টু বিজয় (খণ্ড 2)

ভেলেন্টাইন ডে বুলি স্পিচিয়েল কিবা এটা বনাম বুলি বিয়াত কোনোবাই গিফ্ট দিয়া ৰন্ধন প্ৰকৰণৰ কিতাপ খন বিজয়ে আলমাৰিৰ পৰা উলিয়াই জাৰি জোকাৰি ল'লে৷ কিতাপখন হাতত লৈ ধন্যবাদ জনাবলৈ লেখকৰ নামটো তথা গিফ্ট দিয়াজনৰ নামটো কিতাপখনৰ বকলা এৰাই যোৱা বাবে নাপালে যদিও অন্তৰতে ধন্যবাদ এটা জনাই পাকঘৰত সোমাল৷

এটা এটাকৈ আইটেমৰ ফটোবোৰ চাই গ'ল৷ দুখনমান ফটো চাই লোভত মূখৰ পানী ওলাব ধৰাত ইফালে সিফালে কোনোবাই দেখিছে নেকি চাই হেঁপাহ পলুৱাই ফটো খনতে চেলেক দুটা মানো মাৰি ল'লে৷

শেষত ডিচ এখনত ঠেং ভৰি মেলি লাং খাই পৰি থকা চিকেনৰ ফটো থকা আইটেম এটা বিজয়ৰ পচন্দ হ'ল৷ ইংৰাজীতে লিখি থোৱা ৰন্ধন উপকৰণ বোৰ জোটাই জোটাই পঢ়িবলৈ ধৰিলে৷ প্ৰথম উপকৰণটো পঢ়িয়েই বিজয়ৰ পিলাই চমকি গ'ল৷
1 one dressed chicken

হে প্ৰভু, মইটো মুৰ্গী বোৰক কাহানিও ড্ৰেচ পিন্ধা দেখা নাই৷ ইমান এডুকেটেড মুৰ্গী বিছাৰি পাম ক'ত? কৰবাত ড্ৰেচ নিপিন্ধা মুৰ্গীৰ আইটেম আছে নেকি ঘপাঘপ পাত লুটিয়াই বিছাৰিব ধৰিলে৷ নাই সকলো আইটেমতে ড্ৰেচড চিকেন৷ বিজয়ে মনতে বোলে হ'ব, উপাই নাই যেতিয়া বনোৱাৰ আগত মোৰেই কিবা এটা পিন্ধাই ল'ম৷

পিছে আকৌ লেঠা লাগিল, আইটেমটোত মুৰ্গীটো মতা নে মাইকী মেনচন কৰা নাই৷ যদি টেষ্ট নহয়, বন্দিতাই ইমান সোপা মা-মছলা কিয় খৰচ কৰিলে বুলি বৈদ্য গালি দিব৷ সেয়ে ক'লা পেনটো আনি পিছত যাতে ঘৈণিয়েকক দেখুৱাব পাৰে তাৰ বাবে কিতাপখনৰ 1 dress chicken ৰ আগত সৰুকৈ মতা বুলি লিখি থলে৷ 1 মতা dressed chicken. বচ হৈ গ'ল৷

বাৰিলৈ গৈ চৰি থকা মতা মুৰ্গী এটাক ধৰি নিজেই মুখৰে "কক'ৰ কক'ৰ" বুলি চিঞৰি " অ শিয়ালে নিলে অ, মতাটোক শিয়ালে নিলে" বুলি চিঞৰি চিঞৰি কাষৰ মানুহবোৰক শুনালে৷ শৰণ লোৱা মানুহ যে, উপাই নাই৷ মুৰ্গী খাই পাখী এমাইল দুৰত পুতি থৈ আহিব লাগে যাতে ৰাইজে গ'ম নাপাই৷

মুৰ্গীটো আনি ড্ৰেচ কৰাবলৈ মুৰ্গীৰ জোখৰ কাপোৰ বিছাৰিব লাগিল৷ নিজৰ চাৰ্ট পেন্ট হাফপেন্ট সকলো মুৰ্গীৰ চাইজতকৈ ডাঙৰ৷ উপাই নাই, কিতাপত লিখা আছে যেতিয়া পিন্ধাবই লাগিব৷ শেষত বহু দিন আগতে কিনা জকিটো গডৰেজ খুলি ওলিয়াই আনি বোলে, "হুহ, এইটোকে পিন্ধি ল', টেষ্টৰ কথা আছে৷ মইও দুদিনমান হে পিন্ধিছিলো,নতুনেই হৈ আছে৷ তোৰ ভাগ্যতে আছিল৷ পিন্ধি ল' বুলি মুৰ্গীক পিন্ধাই ল'লে৷ ফেচবুকত "ড্ৰেচড চিকেন" বুলি আপলড দিবলৈ ম'বাইলৰ কেমেৰাত ক্লিক কৰিব লওতেই মুৰ্গীয়ে চাঞ্চ পাই হাতৰ পৰা ওলাই বিজয়ৰ জকি পিন্ধি দৌৰ মাৰিলে.....
*********