বিশ্বকৰ্মা বাবা কি জয়

১) অন্য দেৱ-দেৱীৰ নিৰ্দিষ্ট তিথি আছে গতিকে তিথি মিলাই অগা পিছাকৈ পূজা ল'বলৈ মৰ্ত্যলৈ আহে কিন্তু বিশ্বকৰ্মা বাবা মডাৰ্ণ চিন্তাধাৰাৰ । ইঞ্জিনীয়াৰ প্ৰফেচনত থকা বাবেই নেকি সদায় তেওঁ ফিক্স ডেটত নিজৰ পূজাভাগ ল’বলৈ আহে ।

২) বিশ্বকৰ্মাৰ পূজাৰ দিনা বিশ্বকৰ্মা বাবাকো আপুনি ক’ৰবাত বিচাৰি উলিয়াব পাৰিব কিন্তু বাবাৰ পূজা কৰা দেউসকলক ঔষধত দিবলৈকো নাপাব। এজন দেউ হাজাৰখন পূজাথলী, কিমান চৰ্ট কাট মেনেজ কৰিব লগা হয়, আপুনি কি বুজিব?

৩) বাবাৰ পূজাত মন্ত্ৰৰ উপৰিও কাণ তাল মৰা হিন্দী গানৰ দ্বাৰা অৰ্চনা-বন্দনা কৰা হয় ।

৪) বিশ্বকৰ্মা বাবাই হয়তো তেওঁৰ বক্ত সকলে বজোৱা বাপ্পী লাহিৰীৰ গীত “আই এম এ ডিস্কো ডেন্সাৰ” বা “জিলে লে জিলে লে” শুনি বৰ আমোদ পায়। উষা উথুপৰ গীতো প্ৰিয়, পিছে যোৱা কেইবছৰমানৰ পৰা “ শ্বিলা কি জৱানী” আৰু “মুন্নী বদনাম হুয়ি” "পানী পানী" গীতৰ ফৰমাইচ দিয়া বুলি ভক্ত সকলে জানিবলৈ দিছে ।

৫) মূৰ্ত্তি বিসৰ্জনৰ দিনা তেওঁৰ ভক্তসকলৰ দ্বাৰা উক্ত গীতৰ তালে তালে পৰিবেশন কৰা “অদ্ভুত নৃত্যত” সন্তুষ্ট হৈ পিছৰ বছৰ একেটা দিনত পুনৰ লগ পোৱাৰ প্ৰতিশ্ৰুতি প্ৰদান কৰি বিদায় লয় ৷

৬) বহু ভক্তই বাবাৰ পুৰণি মূৰ্তিসমূহ নদীত বিসৰ্জন নিদি ৰাষ্টাৰ ডিভাইদাৰত থৈ আহি সন্তুষ্টি লাভ কৰে আৰু জহি খহি নোযোৱা পৰ্য্যন্ত উপায়হীন বাবাই ট্ৰেফিক ডিউটি সুচাৰুৰূপে পালন কৰে।

৭) ৰাষ্টাৰ কাষত ট্ৰেফিক পুলিচৰ দৰে এটা হাত দাঙি ৰৈ থকা বস্ত্ৰহীন বাবাৰ অৱস্থা দেখি নেক্সট আহিবলগীয়া দূৰ্গা দেৱী আৰু তেওঁৰ এচিটেণ্টসকলে আগতেই ৰিটাৰ্ণ ৰিজাৰ্ভেচন টিকট বুকিং কৰি ৰাখে। আজিকালিটো তেওঁলোকে বিজি চিডিউল অৰ্থাৎ তিথি এনেদৰে মিলাই লয় যে দুদিনৰ পূজা একেদিনাই সম্পূৰ্ণ কৰি দৌৰাদৌৰিকৈ ৰিটাৰ্ণ হয়৷ তাকে দেখি বহু ভক্তই পূজাৰ ছুটি কম হোৱা বাবে ইনাই বিনাই থকাও পৰিলক্ষিত হয়৷

৮) বাবাৰ ভক্ত সকলে দিনত খিচিৰি আৰু ৰাতিলৈ ফূৰ্তি পানীকণৰ ব্যবস্থা সুন্দৰকৈ আয়োজন কৰা দেখা যায় আৰু ইমানেই অধিক ফূৰ্তি হৈ যায় যে ৰাতি লৈ বাবাৰ “জেণ্ডাৰ” চেঞ্জ হৈ “বিশ্বকৰ্মা মাইকি জয়” হৈ যায় ।

৯) কিছুবছৰ আগলৈকে বাবাৰ হাতীটোৰ বৰ ডিমাণ্ড আছিল, বাবাক হাতীৰ পৰা নমাই হাতীটোক কিছুসংখ্যকে নিজৰ কাৰ্য্যালয় বা ঘৰত স-গৌৰৱৰে সজাই ৰাখিছিল।

১০) নতুনকৈ আকৌ সেই একেই ডিমাণ্ড পুনৰ অ'ত তত বাঢ়িবলৈ লৈছে, মাত্ৰ বাবাৰ হাতৰ পদুম ফুলটোও হাতীৰ শুঁৰত লগাই থোৱা ট্ৰেণ্ড এটাহে নতুনকৈ দেখা পোৱা গৈছে৷ চকুচৰহা সকলে কোৱা মতে তেওঁলোকে গ্ৰাহ গজেন্দ্ৰ উপাখ্যানত ৰজা গজেন্দ্ৰ নামৰ হাতীটোৱে পত্নী সকলৰ লগত জল ক্ৰীড়াত মগ্ন হৈ থাকোতে গ্ৰাহ নামৰ ঘৰিয়ালটোৱে কামুৰি টানি পানীলৈ নমাই দিয়াত পৰিত্ৰাণৰ বাবে উপায় নাপাই পদুম ফুলটোকে শুঁৰত লৈ নাৰায়নক স্তুতি কৰি জীৱন ৰক্ষা কৰা কাহিনী ভাগৰ পৰা ইঞ্চপায়াৰ্ডহৈ হে নতুন ট্ৰেণ্ডটো লৈছে৷

যি কি নহওক ১৭ তাৰিখে ঘৰত থকা আন যন্ত্ৰ সমুহ ধুই পখালি ৰঙা ফোঁট দিবলৈ লওঁতে হাতত লৈ বৰ্তমান আপুনি ফেচবুক কৰি থকা যন্ত্ৰ বিধকো যাতে ধুই পখালি ৰঙা ফোঁট দিবলৈ নাপাহৰে৷ লগতে কোনোবাই নতুন মোবাইল লেপটপ লৈছে যদি তাৰ ওপৰত নাৰিকল ভাঙিবলৈ নাপাহৰিব৷

**********