চাইড বিজিনেছ........

আমাৰ চুবুৰীৰ আটাইতকৈ টেলেন্টেড ল'ৰাটোৰ কথা লিখিব লৈছো ৷ অন্নপ্ৰসন্নত কিতাপ, কলম, মাটিৰ লডা আৰু পইচা দি ল'ৰা ভৱিষ্যতে ডাঙৰ হৈ কি হ'ব কৰা টেষ্টটোত সুখ্যাতিৰে সি এশ টকীয়া নোট খন লৈ যি লাই বাঢ়ে দুপাততে চিন কথাষাৰক প্ৰতিষ্ঠা কৰাৰ পিছৰে পৰা তাৰ প্ৰতিভা ফাটি ফুটি বিকশিত হ'বলৈ ধৰে ৷

একেবাৰে সৰু হৈ থাকোতে ১০, ২০ বা ১০০ টকীয়া নোট দি কোন খন লাগিব সুধিলে, বেটাই সদায় ১০০ টকীয়া নোট খনতে হাত দিছিল, খুচুৰা পইচা দিলে কেৰাহিকৈয়ো নাচায় । যেতিয়া অলপ জনাবুজা হ’ল সি ইমানেই টেলেন্টেড হ’ল যে সিঁহতৰ ঘৰত তাৰ ভয়ত ভীক্ষাৰিও আহিবলৈ ভয় কৰা হ’ল, জানোচা ওলোটাই কিবা দি আহিব লগিয়া হয় ৷

নেওঁতা শিকিয়ে পঢ়া শুনা বাদ দিলে । তাৰ জীৱনত জমা খৰচৰ অংক শিকাই নহ’ল পিছে এইটোও সত্য যে “জমা খৰছৰ” অংক নিশিকিলেও তাৰ সকলো জমাৰ ঘৰতেই থাকে খৰছ হয় দেউতাকৰ বা তাৰ লগৰ কেইজনৰহে । যি কি নহওক কিয়, চকুৰেই অংক কৰি লাভৰ হিচাপ উলিয়াই ল'ব পৰা টেটোনে আজি লৈকে কোনো “লাভ” নোহোৱা কাম কৰি পোৱা নাই ।

সিদিনাখন হঠাৎ মোৰ ওচৰত আহি সি উপস্থিত। হাতত এখন চান্দাৰ বহি আৰু এখন দিঘল লিষ্ট, মই কিবা কোৱাৰ আগতেই ৫০১ টকাৰ ৰচিদ এখন হাতত গুজি দি সি ক’লে বোলে দাদা এইবাৰ গাঁওৰ পুজা ভাগৰ মই সম্পাদক । চহৰত থকা গাঁওৰ সকলোৰে পৰা চাঁন্দা উঠাব আহিছো । মই বোলো তই ৰাজহুৱা কামত ধৰিলি যে, কিবা প্ৰফিট হয় জানো তোৰ? সেমেনা সেমেনিকৈ সি ক’লে দাদা ছোৱালিক বয়স আৰু পুৰুষক আৰ্জন সুধিব নাপাই তথাপি নিজৰ বুলি যোৱা বাৰ বিহুত বাইক এখন ল’লো বুলি থোৰতে কৈ থলো। মই বোলো সুন্দৰ ।

তাৰ কথাৰ পৰা যি বুজিলো গোটেই বছৰটো সি “চাইড বিজিনেচ” ত লাগি থাকে । March-April ত “বিহু মেলা”, May-june লৈকে “বহাগী বিদায়”, July-August ত জন্মাষ্টমী ”, September-October “গনেশ-বিশ্বকৰ্মা-দূৰ্গা পূজা” November December” “কালি পূজা, মাঘৰ বিহু” January February “সৰস্বতী পূজা”, তাৰ মাজতেই ডেঞ্চ কম্পিডিছন, নানা প্ৰকাৰৰ দিৱস উৎযাপন সমুহটো আছেই । মুঠতে ক’বলৈ গ’লে চাইড বিজিনেছ জিন্দাবাদ ।

সুবিধা পাই মই সুধিলো বোলো মানুহবোৰে দান-বৰঙণি ঠিকে ঠাকে দিয়ে জানো? সি বোলে দাদা আইডিয়া লাগিব ।ধৰক, কোনোবা এজনক বিহুৰ কিবা এটা অনুষ্ঠানত সভাপতি পাতি দিলো হাজাৰ টকীয়া চাঁন্দা পাই গ’লো, কৰবাত খুড়ী মাহি পেহী বুলি ধুনীয়াকৈ সম্বোধন এটা দি কিবা কিবি গুণ গাই দিলো, পাই গ’লো ন’হয় ২০০ ৰ পৰা ৫০০ টকীয়া চান্দা ।

কাৰোবাৰ পুতেক জীয়েকৰ গুন গাই দিও, ১০০-২০০ ৰ বাবে। আৰু অন ৰ’ড কালেকচন মানে ৰাষ্টাত গাড়ি ৰখাই কৰা কালেকচন সমুহটো আছেই ।আৰু আপোনাৰ দৰে চাকৰিয়াল সমুহৰ বাবে এখন বেলেগ লিষ্টটো আমি বনায়ে ল’ও ।

মই বোলো শেষত অ’ডিত কৰি জমা-খৰচৰ হিচাপ ৰাজহুৱা ক’ৰনে নাই ? সি বোলে দাদা কি কয় আপুনি, ইয়াত সদায় লোকচানৰ ঘৰতে হিচাপ দিয়া যায় আৰু আপোনালোকৰ দৰে জনা শুনা মানুহ সকলেনো ক’ত আৰু সেইবোৰ হিচাপ ল’বলৈ যাব ?

অনিচ্ছা স্বত্বেও শেষৰ প্ৰশ্নতো কৰিলো, বোলো তই যে মোক সকলো গুমোৰফাঁক কৈ দিলি ইয়াৰ পাচত জানো তই মোৰ পৰা আৰু কিবা বৰঙণী পাম বুলি আশা কৰিবি ? তামোলখন মুখত ভৰাই সি বোলে, দাদা আপুনি যে দিব মই খাটাং জানো, কাৰন আপোনাৰ অফিচৰ টেবুলখনো ভাল আৰু আজি কালি মই RTI ও কৰো নহয় ৷

পকেটৰ পৰা পাঁচশটকীয়া ন'ট খন টপক কৈ উলিয়াই দি বোলো তোৰ নেক্সট “বিজিনেচ” জনসাধাৰনৰ প্ৰতিনিধি হ’ব মই আজিয়েই ভৱিষ্যতবাণী কৰিলো ৷
********