বহুদিন আগৰ কথা৷ বিজয় তেতিয়া চফল ডেকা৷ খুন ভৰি মাংগ, প্যাচি হৱেলী, খটৰনাক খিলাড়ী, মে ইনচাফ কা প্যাচি , তুঝে জিনে না দুংগা আদি চিনেমা বাগানৰ পৰ্দাত চোৱাৰ ওপৰিও লগৰ দুটা মানৰ লগত হ'লত নাইট শ্ব চাই আহি ৰাতি বিচনাত বাগৰি বাগৰি প্ৰায়ে নিজকে চিনেমাৰ হিৰ'ৰ দৰে কল্পনা কৰিব ধৰিলে৷
"মে দৰিন্দা তেৰে প্যাৰ কা লুটেৰা" আৰু "খুন কা প্যাচা দুলহন" চিনেমা দুখন চোৱাৰ পিচৰ পৰা লাহে লাহে বিজয়ৰ জীৱনলৈ পৰিবৰ্তন আহিব ধৰিলে৷ নিজকে চিনেমাৰ নায়কৰ দৰে সজাব ধৰা হ'ল, কথাও ডায়লগৰ দৰে কোৱা হ'ল৷ সাজ পোচাকৰো পৰিবৰ্তন আহিল৷
খালী গাত ......কেতিয়াবা ক'লা গে়ঞ্জীৰ ওপৰতে লেডাৰৰ জেকেট, ডিঙিত ৰঙা ৰুমাল, টাইট জিনচৰ পেন্টটো ব্লেডৰে আঠুৰ ওপৰত অঁকিয়াই দীঘ এৰুৱাই বাণী হে ৰাখিলেগৈ৷ ভৰিত বিটিল জোটা৷ মুঠতে পুৰা হিৰ' মাফিক কায়দা৷
সেই সময়তে আকৌ অসমত ভিচিডি চিনেমা বনোৱাৰ খুৱ উজান উঠিছিল৷ গাওঁৰে লগৰ এটাৰ লগত সন্ধিয়া তিনিয়ালিত চানাখাই থাকোতে কেঁচা চানাৰ ফলা কাগজখনত এটা ইষ্টাহাৰ দেখিলে৷ " সুঠাম নায়কৰ প্ৰয়োজন"৷ বিজয়ে লগৰটোক সুধিলে বোলে সুঠাম মানে কি অ'?
লগৰটোৱে বোলে জানো আজিকালি মাকবাপেকে ল'ৰাছোৱালী বোৰৰ বৰ জেং জেং নাম দিব ধৰিলে নহয়৷ এই থুলুক বৰ্তাৰ নাতিনিয়েকটোৰেই নাম নেকি? কিয় সুধিলি?
বিজয়ে বোলে গৰু , একো নাজান তই৷ সেই বাবেই তহত চিনেমাৰ হিৰ' হ'ব নোৱাৰ৷ হেৰৌ সুঠাম মানে মোৰ দৰে হিষ্ট পুষ্ট আহল বহল চেহেৰাৰ মানুহক কয়৷
লগৰটোৱে বোলে এনেকুৱা চেহেৰাক পেটুৱা বুলি হে কোৱা শুনিছো৷
বিজয়ে বোলে সেইটো মুখৰে কোৱা কথা, অভিধানমতে সুঠাম মানে মোৰ নিচিনা লোদোৰ পোদোৰক কয়৷ এই বুলি চানাৱালাৰ পৰা বাকী ফোন নম্বৰ থকা আনটোফাল টুকুৰা বিচাৰি লৈ পকেটত ভৰালে৷
ইমানদিন মনতে পুহি ৰখা হিৰ' হোৱা সপোনটো পুৰণ হোৱাৰ আশাটো বিজয়ৰ ক্ৰমে কাষ চাপি আহিল৷ ডাইৰেক্টৰ প্ৰডিউচাৰ কাহিনীকাৰ সোনটো ৰঞ্জন বৰুৱাৰ লগত বিজয়ে কথা পাতি গম পালে যে বৰুৱাই যোৱাবাৰ আলুখেতি কৰি পোৱা টকাৰেই চিনেমাখন বনাবলৈ আগবাঢ়িছে৷ কোনো ৰিক্স নলয়, এক্টিং যাৰ ভাল তাকেই হিৰ'ৰ ৰ'ল দিব৷
বিজয়ে ফোনতেই শ্বলে চিনেমাৰ হেমা মালিনীৰ "চ'ল ধন্নু আজ তেৰে বচন্তীকা ইজ্জত কা চৱাল হে" ডায়লগটো মাৰি শুনালে৷ সোনটোৱে বোলে বাৰু কালিলৈ আহি যাবা, লেডিজ ভয়চটো ভাল লাগিছে, যদি চেহেৰাটো ঠিকে দেখো হিৰ' হিৰ'য়িন দুইটো ৰ'ল তোমাকে দিম৷ খৰচো অলপ কমিব আৰু তুমিও দুটা ৰ'ল কৰি নিজৰ সুপ্ত টেলেন্ট দেখাবলৈ সুবিধা পাবা৷
কথামতে কাম, পুৱাই বিজয়ে ড্ৰেচপাতি কৰি লগতে বেগত খুড়িয়েকৰ শাৰীএখন আৰু লাগতিয়াল দুই এপদ কাপোৰ লৈ সোনটো ৰঞ্জন বৰুৱাৰ ঘৰ পালেগৈ৷ সোনটোৱে বিজয়ৰ চেহেৰা চাই একো নকলে যদিও কথা পাতি গম পালে যে বিজয় চিনেমাত ওলাবলৈ পগলা হৈ আছে৷
সোনটোৱে বিজয়ক কাহিনীটো শুনালে যে "কাহিনীটো এজন ডেকা খেতিয়ক ল'ৰাৰ, গাওঁৰে মালতিক ভাল পাই আৰু আলুখেতি কৰি পোৱা পইচাৰে চহৰত গৈ বিজনেচৰ কামত লাগে আৰু তাতে জেউতিক লগ পাই আৰু জেউতিৰ লগত প্ৰেম হয়৷ জেউতিয়ে মালতিক আগতে ভাল পোৱা কথা গম পাই আৰু তাৰ লগত ব্ৰেক আপ হয়৷ হিৰ' গাৱলৈ ঘুৰি আহিবৰ সময়ত বাছত ঘৰৰ পৰা পলাই অহা সেউতি বুলি ছোৱালী এজনীক লগ পাই আৰু প্ৰেমত পৰে আৰু তাইক ঘৰলৈ লৈ আনে৷
কাহিনী শুনি বিজয় ৰ'ব নোৱাৰা হ'ল৷ কল্পনাত মালতি, জেউতি সেউতি তিনিজনী দৌৰিব ধৰিলে ৷ বিজয়ে বোলে ভগৱান জৱ দেতা হে চপ্পৰ ফাৰকে দেতা হে ৷ মোৰ দৰে হিৰ'ৰ তিনিজনী হিৰ'ইন৷ বিজয়ে ডাইৰেক্ট বোলে চুটিং কেতিয়া আৰম্ভ কৰিব? মই ৰেডি৷
সোনটোৱে বোলে আজিৰ পৰাই আৰম্ভ কৰো৷ আজিৰ চিনটো হ'ল খেতিয়ক হিৰ'ই খালী গা, ধুতিৰ পোন মাৰি আলুখেতিৰ বাবে দুৰৈৰ পুখুৰীৰ পৰা পানী আনি ড্ৰামত জমা কৰে আৰু আলুগছত পানী দিয়ে৷
বিজয়ক ড্ৰেচপাতি কৰাই সোনটোৱে চনি হেন্দিকেমটো লৈ তাৰ আলুৱনীডৰালৈ লৈ গ'ল৷ ডাঙৰ দুটা টিনৰ বাল্টিং হাতত দি বোলে সৌতো পুখুৰী৷ মই একচন কম পানী আনি ড্ৰামত ভৰাবা৷ কাট নোকোৱালৈ কিন্তু নেৰিবা৷ মোক এক্টিং নহয় ৰিয়েলিটি লাগে ৰিয়েলিটি৷
একচন.........
বিজয়ে পুখুৰীৰ পৰা পানী আনি ড্ৰামত থয়৷ লগে লগে সোনটোৱে কয় একচন......বিজয়ে আকৌ দুই হাতে বাল্টিং লৈ পুখুৰীলৈ যায়৷
পুৱা দহ বজাৰ পৰা বিজয়ে পানী কঢ়িয়াই আছে, সোনটোৱে একচন কৈ আছে, বিজয়ে পানী কঢ়িয়াই আছে, সোনটোৱে একচন কৈ আছে৷
বেলি পৰালৈ বিজয়ৰ পেটত ভোকে কলমলাব ধৰিলে পিছে ডায়লগ নাই দিয়া ডাইৰেক্টৰে গতিকে মাতে কি দৰে? ইফালে কাট কৰাও নাই৷
শেষত বিজয়ে উপাই নাপাই ভোক লগাৰ আকাৰে ইংগিতে বুজাব ধৰিলে ৷ নাই সোনটোৱে কাট নকয়৷ এসময়ত বিজয়ে বাল্টিঙে চাল্টিঙে মাটিতে লুটি খাই বাগৰি দিলে৷
সোনটোৱে বোলে কাট....... সুন্দৰ এক্টিং৷
বিজয়ে মনতে বোলে তোৰ মুৰটো৷ খালি পেটে ডেৰশ দুশ বাল্টিং পানী কঢ়িয়ালি, হেৰৌ ভোকত বাগৰিছো, তাকো তই এক্টিং ক'ব আহ' কটা নিধক৷
সোনটোৱে পানীৰ ড্ৰাম দুটাৰ ফটো লৈ বিজয়ক বোলে সুন্দৰ কালিলৈ আলু গছত পানী দিয়া চিনটো চুটিং কৰিম৷
বিজয়ে বোলে হিৰ'ইন কেতিয়া ওলাব?
সোনটোৱে বোলে আলু খান্দিবৰ সময়ত৷
বিজয়ে বাল্টিং দুটা হাতত লৈয়েই বেহুছ হৈ মাটিত লুটি খাই বাগৰি পৰিল..........
***********
No comments:
Post a Comment