থুলুকৰ ফাৰ্ষ্ট লাভ

থুলুক তেতিয়া চফল ডেকা৷ চকুত দিনে ৰাতিয়ে গগলচ, টাইট জিনচৰ পেন্ট তাকো আঠুৰ তলত ব্লেডৰে অকিয়াই ফালি লোৱা৷ মানুহৰ লাওখোলাৰ ফটো থকা টি চাৰ্ট৷ ওপৰত দুই তিনিডাল শিকলী ওলমি থকা লেডাৰ জেকেট, ভৰিত মেকানিকচৰ জোটা, কপালত আমেৰিকাৰ ফ্লেগৰ ৰুমাল বান্ধি গাৰ্লচ হোষ্টেলৰ আগত লাইটৰ পষ্টৰ দৰে খাৰা হৈ ৰৈ থাকি অহা যোৱা কৰা ছোৱালীবোৰ চাই৷ কোনোবা এজনীয়ে যদি থুলুকৰ হুলিয়াটো দেখি অকন হঁহা যেন কৰে, থুলুকে তাই পতিল বুলি দুখোজ আগুৱাই যায়৷ পিছে যেতিয়া ছোৱালীয়ে পোন্দোৱাকৈ ৰৈ চাই দিয়ে, থুলুকে আকাশলৈ চাই আকাশৰ তৰা গন্তি কৰা দি আঙুলিৰে কিবা গন্তি কৰা যেন দেখুৱাই দুখোজ পিছুৱাই আহে৷


প্ৰকৃততে থুলুকৰ ভিষণ মন যে তাকো কোনোবাই চাব, কোনোবা তাৰ ভেলেন্টাইন হ'ব৷ বাইকৰ পিছত বহুৱাই ডেটিঙত যাব৷ কিমান যে সপোন৷ ছোৱালী এজনী দেখিলেই মনত থুলুকৰ চিনেমা আৰম্ভ হৈ যায়৷ যেন ছোৱালীজনীয়ে তাৰ ফালে স্ল ম'চনত জানু.জানু..বুলি চিঞৰি দৌৰি আহি সাৱটি লৈছে৷ আই লাভ ইউ থুলুক, আই লাভ ইউ৷ তাৰ পিছত বিয়াৰ ৰিলটো চলে কল্পনাত, তাৰ পিচত হস্পিতাল, বেকগ্ৰাউণ্ডত কেঁচুৱাৰ কান্দোন, তাৰ পিচত কেঁচুৱাই কোঁচত চুচু কৰা.....এইখিনিতে উপৰৰ পৰা কাউৰীয়ে গাত এহ কৰি দিওতেই কল্পনাৰ চিনেমাখন সেইখিনিতে ৰিল চিঙি বাস্তবলৈ গুছি আহে৷

এনেদৰে, দিনৰ পিচত দিন বাগৰিব ধৰিলে, থুলুকৰো চাৰ্ট পেন্ট সোলোক ধোলোক হ'ব ধৰিলে, অ'ত ত'ত দুই এডাল দাড়ীও ৰং সলালে৷ কলা চুলিৰ মাজতো বগা ছুলি বোৰে মূৰ দাঙি ঠিয় হ'ব ধৰিলে৷ তেনে সময়তে এগৰাকীয়ে থুলুকক অলপ পাত্তা দিব ধৰিলে৷ কেই দিনমান মিছকল মিছকল খেলাৰ পাচত লাহেকৈ কল পকিবলৈ ধৰিলে, মানে ৰিচিভড কল হ'ল৷ টপ আপ কাৰ্ড ভৰাই অল কল ফ্ৰী কৰি লৈ শাকে মাছে খোৱাৰ পৰা টইলেতত পানী নোহোৱা কথালৈকে পাতিব ধৰিলে৷ গাঁৱৰ বুঢ়াবোৰে আকৌ কাণত অনবৰতে লাগি থকা ম'বাইলটো আৰু বেকা ডিঙিটো দেখি স্পণ্ডলাইটিছ বেমাৰ ভাল কৰা কিবা মেছিন বঢ়ালে বুলিহে ভাবিছিল৷

যি কি নহওক কলটো সিফালৰ পৰা কটাৰ পিছতে থুলুকে দীঘলকৈ পু..ও...পু...পু ....শব্দ কৰি ম'বাইলটোতে চুমাটো খাই লৈ ম'বাইলটো হাতত লৈ অলপ দুৰলৈ নি এনেকৈ মিচিকিয়া হাঁহি মাৰি চাই যেন গোটেই একেবাৰে প্ৰেমিকাজনীহে৷

বহু দীঘলিয়া কলকলনি আৰু এচ এম এছ কৰি কৰি আমুৱাই যোৱাত এদিন থুলুক আৰু প্ৰেয়সীয়ে ঠিৰাং কৰিলে যে লগ হ'ব৷ কথা মতে কাম৷ দুদিন আগৰ পৰা থুলুকে ডেইলি গা পা ধুই, গাত তেল টেঙা ঘঁহি ৰ'দত বহিব ল'লে, ফেয়াৰ এণ্ড হেণ্ডচাম,এটাও কিনি আনি লেপলেপিয়াকৈ ঘঁহিলে৷ আৰু ডেটিংৰ দিনাই পুৱা মন্দিৰত ধূপ কাঠি এডাল জ্বলাই পাৰ্কলৈ বুলি ঠিক কৰা সময়তকৈ দুঘন্টা আগতে গৈ হাজিৰ৷

লগ পোৱা সময় ওচৰ চাপি আহিব ধৰিলে ইফালে থুলুকৰ কল্পনাত এখনৰ পিচত এখন হিট চিনেমা দৌৰি আছে৷ সময় বোৰ নাযায় নুপুৱাই৷ কাষৰে ডেটিংত যোৱা প্ৰেমিক প্ৰেমিকা এহালক তিনিবাৰ মান দহ মিনিটৰ মুৰে মুৰে "দাদা কেইটা বাজিল" সুধিব ধৰিলে৷ এফালে থুলুকৰ বয়সতকৈ কমেও বিশ বছৰ সৰু ল'ৰাটোক দাদা সম্বোধন কৰা বাবে আৰু দহ মিনিটৰ মুৰে মুৰে ঘড়ীৰ সময় খুজি ডিষ্টাৰ্ব দিয়াত ল'ৰাটোৱে ঘড়িটো খুলি পকেটত ভৰাই বোলে খুড়া আজি প্ৰথম ডেটিং নেকি? থুলুকে বোলে হয় একদম প্ৰথম, মানে আগৰ জনী লগত ডেটিং অহা নহলেই যে, প্ৰেকটিছ ও নাই, ভয় ভয় লাগি আছে৷

এনেতে প্ৰেমিকা আহি ওলাল৷ ফটোত দেখাৰ দৰে ধুনীয়া নহলেও মোটা মুটি ঠিকেই আছে, পাৰ্লাৰৰ পৰা ডাইৰেক্ট পাৰ্ক অহাত যেনিবা থুলুকৰ ভালেই লাগিছে দেখি৷ থুলুকে নিজৰ লেডাৰৰ জেকেটৰ চেইনডাল খুলিব ধৰিলে .....

ছোৱালীয়ে বোলে কি কৰে, কি কৰে?

....থুলুকে লাহেকৈ ভিতৰৰ পৰা দীঘল ঠাৰিৰ সৈতে ৰঙা গোলাপ এটা উলিয়াই এটা ভৰিৰে আঠু কাঢ়ি বোলে

" হুইল ইউ বি মাই ভেন্টালাইন?"

ছোৱালীও ইংৰাজীত চোকা ৷ কৈ দিলে গপচত বোলে

" ইয়েচ আই এম ইউৰ অলৱেজ ভেন্টিলেচন....৷

থুলুকে মনতে বোলে যি দেখিছো মোতকৈও এই ইংৰাজীত অলপ কেঁচা ৷ বেয়া নহয় বেছিকৈ ইংৰাজীত গালি দি থাকিব নোৱাৰিব৷ থুলুকে বোলে আৰু এবাৰ চোৱা যাওক ইংৰাজীতে, এই বুলি বোলে

"আৰ ইউ কমফৰ্ট ফিলিং উইথ মি?"

তাই বোলে "ইয়া ইয়া আই এম কম্পাৰমেন্টেল লাইক ইউ"৷

থুলুকে তাইৰ ইংৰাজিত দিয়া উত্তৰ শুনি ইমান ফুৰ্তি হ'ল যেন টপক কৈ চুমাটোহে খাই দিব৷

এনেদৰে কিছু সময় কথা পতা পিছত প্ৰেমিকাক থুলুকে বোলে ইউ আৰ মাই ফাৰ্ষ্ট লাভ৷ প্ৰেমিকাই বোলে, ইহ সিদিনা দেখোন কৈছিলা তোমাৰ এজনী লগত আগতে ব্ৰেক আপ হৈছিল বোলে বহু দিন আগতে৷ থুলুকে মূৰতো বহুপৰ খজুৱাই বোলে কি নাম কৈছিলো বা তাইৰ৷ প্ৰেমিকাই বোলে কিবা ঝৰ্ণা নে নিজৰা কিবা এটা আছিল৷ থুলুকে বোলে অ নিজৰা...তাই মোৰ থাৰ্ড লাভ আছিল৷ প্ৰেমিকাই বোলে নিজৰা যদি থাৰ্ড চেকেন্ড কোন আছিল৷ থুলুকে বোলে বোধহয় পুৰৱীয়েই আছিল চেকেণ্ড৷ প্ৰেমিকাই বোলে যদি পুৰৱী চেকেণ্ড আছিল তেন্তে ফাৰ্ষ্ট কোন? থুলুকে বোলে ফাৰ্ষ্ট তুমি বুলি কলোৱেই দেখোন৷ প্ৰেমিকাই বোলে হেৰৌ মোক আজিহে লগ পাইছা প্ৰপজ দিছা, সিহঁত দেখোন আগতেই আহিছিল তোমাৰ লাইফত গতিকে মই আজি আহি তোমাৰ লাইফৰ ফাৰ্ষ্ট লাভ কেনেকৈ হ'লো? থুলুকে বোলে ইহ তোমাক মই কিমান দিনৰ পৰা লাইন দিয়েই আছিলো, তুমিহে অলপ বয়স হোৱালৈ ৰৈ আছিলা৷ মইও তোমালৈ ৰৈ ৰৈ আমনি লাগি ইহত দুজনীক মাজতে ভাল পাই পেলালো৷ পিছে ফাৰ্ষ্ট লাভ তুমিয়েই ৷ প্ৰেমিকাই খঙতে গোলাপটো থুলুকৰ গাত দলিয়াই বোলে ব্ৰেক আপ.....

থুলুকে বোলে ধ্যেৎ আজি প্ৰপজ কৰিছোহে, আজিয়েই ব্ৰেক আপ দিলে মানুহে শুনিলে কি ক'ব? প্ৰেমিকাই বোলে ব্ৰেক আপ মানে ব্ৰেকআপ আৰু, মই যাও৷ এই বুলি তাই যাব ওলাল, থুলুকে বোলে কিনো কৰিম আৰু তুমি ব্ৰেক আপ দিলা যেতিয়া, বাৰু যোৱা যদি যোৱা কিন্তু মোক তোমাৰ লগৰ বৰ্ণালীৰ ফোন নম্বৰটো দি যোৱাচোন৷

তাই বোলে কিয়?
থুলুকে বোলে নহয় এক্সুৱেলি চি ইজ মাই ফাৰ্ষ্ট লাভ........
********