চকুৰ ডাক্টৰ

কালি বিজয় আৰু মই চকুৰ ডাক্টৰৰ ওচৰত চকু পৰীক্ষা কৰাবলৈ গৈছিলো৷ মোক চচমা দিলে তাক নিদিলে৷ সেই খঙতে আজি পুৱাই মোৰ নামত যা তা লিখি পষ্ট কৰিলে৷ কিন্তু আচল কাহিনীটো কোনোবাই জানে জানো৷ নাজানে নহয়৷ শুনক তেন্তে৷

বিজয়ে সিদিনা মোক ফোন কৰিলে বোলে দেৱজিতদা তেজপুৰত ভাল চকু ডাক্টৰ আছেনে? মই বোলো কিয়? সি বোলে নহয় মই বস্তুবোৰ দুটা দুটা দেখো৷ যোৰহাটত ইমান ডাক্টৰক দেখালো কোনেও ঠিক কৰিব নোৱাৰিলে৷
মই বোলো হ'ব, তই আহিবি, মোৰো দেখাব লগিয়া আছে, একে লগে দেখাম৷ সেই বুলি সি কালি আহিল, আমি ডাক্টৰৰ তাত গ'লো৷
ডাক্টৰৰ তাত কি হ'ল পঢ়ক৷

ৰিচিপচন কাউন্টাৰত গৈ ধুনীয়া ৰিচিপচনিষ্ট এগৰাকী দেখি মোক পিচলৈ গতা মাৰি সি আগুৱাই গৈ বোলে তোমালোকৰ কোনজনীয়ে নাম লোৱা?

ৰিচিপচনিষ্ট গৰাকীয়ে ইফালে সিফালে চাই বোলে মই ইয়াত এগৰাকীয়েই বহি আছো আৰু নাম মইয়েই লও খুড়া৷ ৷৷৷৷৷৷

বিজয়ে বোলে তোমাৰ লগৰজনীও তোমাৰ দৰেই ধুনীয়া৷ বাৰু মোৰ নামটো লিখা

বিজয়...বিজয় দিন নাথ চৌহান ...পুৰা নাম৷ বাপ কা নাম দিন নাথ চৌহান, মা কা নাম চুহাচিনি চৌহান, গাঁও মান্দোৱা, ওমৰ চত্তিচ চাল, ন মহিনা, আঠ দিন অউৰ ইয়ে চৌল্লা ঘন্টা চালু হে ....অই......

এইবোৰ একো নহয়, মোৰ নাম বিজয়, বিজয় মহন্ত, ঘৰ বান্দৰচালিয়া ,যোৰহাট৷

ৰিচিপচনিষ্ট গৰাকীয়ে পোন্দোৱাকৈ চাই বোলে অলপ বহক ডাক্টৰে মাতিলে যাব৷
মই বিজয়ক বোলো তই যে দুটা দুটা দেখ প্ৰব্লেম কি পাইছ?

বিজয়ে বোলে আপুনি কি কয় দেৱজিত দা, এজনী ঘৈনিক দেখিলেই মোৰ ভয়ত হাত ভৰি কঁপে, তাতে দুজনী দুজনী দেখো, হাতত দুডাল বেলনা মাৰি, দুডাল জাৰু৷ ভাৱকচোন মোৰ কিমান প্ৰব্লেম হয়৷

এনেতে ডাক্টৰে মাতি তাৰ চকুত চচমাৰ ফ্ৰেম এটা পিন্ধাই বহাই লৈ বোলে মাতকচোন এতিয়া

বিজয়ে বোলে মই একো দেখা নাই৷
ডাক্টৰে আকৌ গ্লাচ লগাই ক'লে এতিয়া দেখিছেনে?
বিজয়ে বোলে নাই দেখা৷
আকৌ নতুন গ্লাচ লগাই বোলে এতিয়া আগতকৈ ভাল দেখিছেনে বেয়া দেখিছে?
বিজয়ে বোলে একো দেখা নাই৷
ডাক্টৰে বোলে আপুনি ডাঙৰ ডাঙৰ আখৰ কেইটাও দেখা নাই নে?
বিজয়ে বোলে দেখাত সৰু আখৰ কেইটালৈকে দেখিছো কিন্তু কি লিখা আছে পঢ়িব নাজানো নহয়৷

ডাক্টৰে বোলে তাকে নকয় কিয়? ৰ'ব, মই ইংৰাজী আখৰ কেইটা সলাই অসমীয়া আখৰ কেইটা দিও৷ এই বুলি অ আ ই ঈ কেইটা পঢ়িব দি বোলে এতিয়া মাতক

বিজয়ে বোলে দন্তিয়া অ, মুৰ্ধন্য আ, অন্তিয়াষ্ট ই,
দ্বিতীয়া ঈ, প্ৰথম উ, বৰ্গীয়া ঊ.....

ডাক্টৰে লগে লগে অসমীয়া আখৰ আতৰাই ডট ডট থকা সংখ্যা কেইটা উলিয়াই বোলে প্ৰতি শাৰীতে কেইটা কেইটা ডট আছে কৈ যাওক৷

বিজয়ে বোলে আগৰখনেই ভাল আছিল৷ গন্টি কৰিবলৈ খেলি মেলি লাগে নহয়৷ তিনিটা যোগ পাচটা যোগ সাতটা ...মুঠতে বাৰটা আছে৷

ডাক্টৰৰ উপাই নোপোৱা হ'ল৷ গোটেই কেইজনী ৰিচিপচনিষ্টক মাতি আনি বিজয়ৰ সন্মূখত খাৰা কৰি বোলে কেইগৰাকী দেখিছে?

বিজয়ে বোলে এতিয়া স্পষ্ট দেখিছো৷ মুখত ক'লা তিল থকা দুগৰাকী বৰ ধুনীয়া৷

আগৰ যিটো ডাক্টৰৰ তাত দেখাইছিলো ডাক্টৰটো দুৰৈত গৈ মোক আঙুলি দেখাই দেখাই কেইটা আঙুলি আছে সুধিছিল৷ মই দুবাৰ মান চকু জপায়ে এনেই গেছ কৰি দুই তিনি বুলি কৈ দিছিলো৷ কি ইন্টাৰেষ্টিং দুৱাৰ মান ব্লাফ মাৰোতেও লাগি গৈছিল৷ তিৰ খেলত তেনেকৈয়ে লাগি যায় মোৰ৷ পিছে আপুনি আঙুলি হিচাপ কৰিব নিদি ছোৱালী কেইজনী হিচাপ কৰিব দি ভাল কৰিলে, নহ'লে এইবাৰো মই ব্লাইণ্ড খেলিলো হয়৷

মই জনাত ডাক্টৰজনৰ আজি পুৱা অহালৈকে হুচ অহা নাই৷