বাম্পাৰ অফাৰ

এটা সময় আছিল কোনোবা দোকানত শাৰী চাদৰ জোটা চেণ্ডেল আদিৰ "ৰিডাকচন চেল" দিছে বুলি গাঁৱৰ এগৰাকীয়ে গম পাবহে লাগে, খবৰটো গাঁৱত বিয়পি পৰিবলৈ বেছি সময় নালাগিছিল৷ দুই তিনিগৰাকী মিলি টাউনলৈ বুলি যাত্ৰা কৰে কেৱল ৰিডাকচনৰ বস্তু কিনিবলৈ৷
"কলিতানিয়ে আনিলেনে? মই গম পোৱা দেৰি হ'ল যে সকলোৱে ঠপা ঠপে ভালৰ ভাল কেইখন নিলেই৷ দুখন মান হে পালো, তাকে আনিলো আপুনি কি ল'লে?"
" মই শাৰী তিনিখন আনিলো৷ দেখাম ৰ'ব"
"কিমানত আনিলে?"
"তিনিশ?? বহুত সস্তাতে পালে দেই৷ সিদিনা বৰুৱানীয়ে এনেকুৱা একেই এখন আনিছে সাতশ দি"
"মই আৰু দুখনমান আনিম বুলি ভাবিছিলো, পিছে ইমান ভিৰ, আৰু ভাল লগাবোৰ কলিতানীহঁতে আনিলেই"৷

এইয়া আছিল তাহানিৰ ৱাটচএপ ফেচবুক জমানাৰ আগৰ দুগৰাকী মহিলাৰ ৰিডাকচন সম্বন্ধীয় কথাবতৰা৷ সময় সলনি হ'ল৷ বহুতে অফিচ কাছাৰিত বাহিৰা দুপইচা বুটলিবলৈও ল'লে৷ গতিকে বহুতে ৰিডাকচনৰ বস্তু বিছাৰি যোৱা মানে ইজ্জত যোৱা বুলি ভাবিৱলৈ ল'লে৷ ফলত দোকানীবোৰৰো ৰিডাকচন চেলৰ ঠাইত আৰম্ভ কৰিলে দোকানৰ আগত ২০% , ৫০% ৭০% ৰেহাইৰ বৰ্ড৷ সেইটো অৱশ্যে ৰিডাকচন চেলতকৈ ষ্টেণ্ডাৰ্ড বুলিয়েই বহুতে গ্ৰহন কৰে৷ অৱশ্যে পিছলৈ ৰিডাকচন চেলে নিজৰ চৰিত্ৰ সলনি কৰিলে আৰু কবলৈ গ'লে পুৰনা বিক্ৰী নোহোৱা সামগ্ৰী কম দামত এৰি দি দোকান চাফা কৰা প্ৰচেষ্টা হিচাপে চলি থাকিল৷
ফিফ্টি পাৰ্চেন্ট, চেভেন্টি পাৰ্চেন্ট ডিচকাউন্ট বৰ্ড থকা দোকানত কাপোৰৰ টেগটো চাই প্ৰথমতে ভাবিবলৈ বাধ্য যে এইটো কোৱালিটিৰ কাপোৰত ইমান দাম নে? পিছে ডিচকাউন্ট দি মেলি কোৱা দামটো শুনি অলপ বিশ্বাস জন্মে৷ ডিচকাউন্ট শব্দটোৰ প্ৰতি দুৰ্বলতা থকা মোৰ শ্ৰীমতীয়ে "এনেই চাওচোন ব'লা" বুলি দোকানত সোমোৱাই দি " ভাল লাগিছেনে" বুলি সোধা প্ৰশ্নটোক "নাই লগা" বুলিটো ক'বলৈ যিহেতু অমুকাৰ সাহসৰ অভাৱ গতিকে শেষত দুহাতে ডাঙিব নোৱাৰালৈকে দোকানৰ নাম লিখিত পলিঠিন বেগ দুহাতত ওলমাই দোকানৰ পৰা ওলায় আহিব লগা হয়৷

সমসাময়িক ভাবে বজাৰলৈ এটাৰ লগত এটা ফ্ৰী অফাৰ বোৰো আহিব ধৰিলে৷ দুটা চাৰ্ট কিনিলে এটা ফ্ৰী ধৰনৰ৷ অফাৰটো কোৱাৰ ধৰনটো সলনি হ'লেও আপুনি মনতে ৫০% ডিচকাউন্ট বুলি মানি লৈ কিনিব পাৰে৷ দুই এটা চাৰ্ট পচন্দ নহ'লেও অফাৰ যেতিয়া মামা পেহা খুড়াকে দিব পাৰিবা ধৰনৰ কেলকুলেশ্চন এটা কৰি শ্ৰীমতীয়ে যেতিয়া ক'ব "লৈ লোৱা" যিমান পৰা যায় পকেট উদং নোহোৱালৈকে দুচকু টুকি শ্ৰীমতীক অফাৰৰ মজা লুটিবলৈ দিব পাৰি৷ শেষত কেৱল মনত এটাই ৰাখিব লাগে যে বেগ আপুনিয়েই কঢ়িয়াব লাগিব৷

কেৱল কাপোৰেই নে বিয়েৰ বাৰতো দুপেগত এপেগ ফ্ৰী অফাৰ টানিবলৈ গৈ শেষত বহুতৰে কেই পেগ পেটত পেলালে হিচাপ হেৰুৱাই লুটি বাগৰ মাৰি ঘৰলৈ অহাও দেখিছো৷ অৱশ্যে সেই বিধৰ অভ্যাস নথকা কাৰন বশত এই বাম্পাৰ অফাৰটোৰ প্ৰতি মহিলা সকলৰ দুৰ্বলতা নাই বুলিহে৷ নহ'লে এক ইশ্বৰে জানে কি হ'ল হয়৷ আৰু আপোনাৰো "অফাৰ দি আছে পুৰা দি দিও ৰ'বা " বুলি কবলৈ সাহৰ অভাৱ বুলিহে এই ক্ষেত্ৰত অলপ ৰক্ষা৷

বিপনীত দিয়া "লুট ল' অফাৰ" পালেটো কথাই নাই৷ মানুহে এনেদৰে দোকানত ভিৰ কৰে যেন সঁচাই দোকানীয়ে মাতিছে আহক মোক লুটি পুটি দেউলিয়া বনাই যাওক৷ অৱশ্যে এনে লুট ল' অফাৰৰ বিজ্ঞাপন দেখি শ্ৰীমতীৰ পাল্লাত পৰি বহুবাৰ নিজেই লুটন খাই অহা অমুকাৰো ৰেকৰ্ড নোহোৱা নহয়৷ পূজা বিহুৰ "ধামাকা অফাৰ" বোৰৰ কথা নকলোৱেই বা৷ ধমাকা অফাৰে পিঠিত কেনে ধামাকা দিয়ে জনাই জনে জানে৷

কাপোৰৰ কথা বাদ সদায় ব্যৱহিত সামগ্ৰী সমূহতো ২০ পাৰ্চেন্ট এক্সট্ৰা, ৩০% একস্ট্ৰা আহিব ধৰিলে৷ টুথপেষ্টটো কিনিলেও শ্ৰীমতীয়ে পেকেটো দীঘল আৰু ৰঙা ৰঙৰ এক্সট্ৰা শব্দটো চাই লোৱা হ'ল৷ লগতে ব্ৰাছ এডাল থাকিলেটো কথাই নাই৷ লাগিলে পুৰণি ব্যৱহাৰ কৰি থকা ডালৰ ম্যাদ থাকিলেও নতুন আনি থব৷ ধূপৰ পেকেটত ৰুমাল কলম ফ্ৰী৷ জেলীৰ লগত চেম্পো ফ্ৰী, স্ন পাউডাৰৰ লগত হাৰ্পিক ফ্ৰী৷ মুঠতে এটাৰ লগত এটা বিনামুল্যে শুনিলেই কিয় নাজানো শ্ৰীমতীয়ে ভাবে যে তেওঁতকৈ লাভজনক চিন্তা কৰা ব্যক্তি দ্বিতীয় গৰাকী যেন পৃথিৱীত নোলাবই৷

সেইখিনিলৈকেও ঠিকেই আছিল৷ আহি গ'ল ফ্লিপকাৰ্ট মিন্ট্ৰা জাবাংগৰ জমানা৷ হাতত ম'বাইল, চকুৰ আগত ফেচনেব'ল ড্ৰেছ৷ তাতে আকৌ "টুডেইজ স্পিচিয়েল অফাৰ 70% ডিচকাউন্ট, চেভেন আৱাৰ্চ লেফ্ট"৷ ক্লিক কৰিলেই হ'ম ডেলিভাৰী৷ গাড়ী কিনিবলৈ পূজা বিহুৰ বাম্পাৰ অফাৰলৈ ৰৈ থকাৰ দৰে থাকিবও নালাগে, প্ৰতিদিনেই প্ৰতি মহূৰ্ত্ততে অফাৰ, মুঠতে ক্লিক কৰিলেই হ'ল৷ অফাৰো এনে যে গোটেই জাবং ফ্লিপ কাৰ্ট কোম্পানীটোকেই কিনি পেলাম যেন লাগে৷ শ্ৰীমতীক বহু দিনলৈ শিকাই দিয়া নাচিলো যদিও এইবোৰ জানো শিকাব লাগে, অফিচত বহি থাকোতে ম'বাইলত অমুক অৰ্ডাৰ তমুক অৰ্ডাৰৰ কোম্পানীয়ে দাঁত নিকটাই দিয়া থেংক ইউ মেচেজ যেতিয়া ধাৰাসাৰে সোমাব ধৰিলে গম পালো যে এইবাৰ অন্তত হাতত দোকানৰ নাম লিখিত প্লাষ্টিকৰ বেগ আৰু মই কঢ়িয়াব নালাগে৷ সেইভাগ ৰডৱেজৰ পাৰ্চেল কঢ়িওৱা ল'ৰাটোৱেই তাঁত বাটি কৰি সম্পাদন কৰিব৷

বাম্পাৰ অফাৰ পাই একেদিনাই তিনিখন বিছনাৰ বাবে একৈশখন বেডচিট, দেহাৰ জোখ কাপোৰৰ জোখৰ অমিলমিল হ'লেও একাউন্টৰ শেষ বিন্দু শূন্য নহালৈকে সকলো কিনি পেলালে৷ শেষত উপায়ন্তৰ হৈ মই বোলো হেৰা অহা মাহত অফিচৰ ফালৰ পৰা বাম্পাৰ অফাৰ এটা দিছে হে৷ "অহা মাহত যদি অনলাইন একো শ্বপিং কৰা নাযায় চেলাৰি ১৫% বঢ়াব বোলে"৷ এনি টাইম বাম্পাৰ অফাৰৰ আশাত জীয়াই থকা শ্ৰীমতীয়ে পিছৰ খিনি কি শুনিলে নাজানো কিন্তু একে জাপেই বোলে ভালে হ'ব দিয়া অফাৰৰ পইচাৰে ভাল অফাৰ আহিলে ডাইনিংৰ চেট কেইটামান কিনি থম মই কিবা বাম্পাৰ অফাৰ আছে নেকি চাও ৰ'বা৷

পুৱাই কিবা বাম্পাৰ অফাৰৰ বিজ্ঞাপন আছে নেকি বুলি পেপাৰখন চকু ফুৰাই শ্ৰীমতীয়ে চিঞৰ মাৰি দিলে৷ মই দৌৰ মাৰি আহি দেখো মূৰে কপালে হাতদি মাটিত বহি শ্ৰীমতীয়ে পেপাৰখন চাই ভোৰভোৰাই আছে৷ মই বোলো কি হ'ল, কি অফাৰ মিছ কৰিলা৷ হাতত পেপাৰ খন দি শ্ৰীমতীয়ে বোলে এপি এচ ছি৷ পেপাৰখন মেলি দেখিলো ৰাহু কেতু শনীৰ (ৰা কে শ) পালত পৰা জনে তিনিজন প্ৰাৰ্থী দিলে এটা পদ ফ্ৰী অফাৰ দিছিল৷