চিন্তা

বান্ধৱী নিলাক্ষীৰ পষ্ট এটাত আজি "চিন্তা" শব্দতো দেখি কিয় জানো চিন্তাৰ বিষয়ে চিন্তা কৰিব মন গ'ল৷ প্ৰকৃততে এই "চিন্তা" বস্তুটোনো কি? ই বৰ চিন্তনীয় বিষয়৷ বহু চিন্তা চৰ্চা কৰি শেষত ভাৱিলো কিনো অযথা চিন্তাবোৰ কৰি আছো? কিন্তু সকলো চিন্তাই অযথা হয় জানো? বহু চিন্তাই মানুহক এজন চিন্তাশীল ব্যক্তিলৈ ৰূপান্তৰিত কৰে আনহাতে বহু চিন্তাই মানুহক মানুহৰ শাৰীতকৈও তললৈ নমাই দিয়ে৷

পিছে চিন্তা নকৰাকৈ জানো মানুহ থাকিব পাৰে? সেইটোও চিন্তনীয়৷ তেনেহ'লে "চিন্তাৰ" ওপৰত একো চিন্তা নকৰো বুলি নিচিন্ত ভাবে মনে মনে বহি থাকিম বুলি থাকিলেও পাৰিম জানো? চিন্তা নকৰো বুলি ভাবি থাকিলেও চিন্তাবোৰ আহি যায় নহয়৷ সেইটোও এতিয়া এটা ডাঙৰ চিন্তা৷ চিন্তা নকৰিও নোৱাৰি৷ চিন্তা কৰিলেও বিপদ, চিন্তা নকৰিলেও বিপদ৷ মুঠতে চিন্তাই খাই দিছে৷ কিছুমানে কেৱল নিজৰ বাবেহে চিন্তা কৰি আৰু কিছুমানে নিজতকৈও বেছি আনৰ বাবেহে চিন্তা কৰে৷

খেতিয়কৰে ভাতমুঠিৰ বাবে চিন্তা, নিবনুৱাৰ চাকৰি এটাৰ বাবে চিন্তা, বৰলাৰ বিয়াৰ বাবে চিন্তা, বুদ্ধিজীৱীৰ দেশৰ বাবে চিন্তা, ফেচবুকত লাইক কমেন্টৰ চিন্তা, পত্নী ধুনীয়া হ'লেও চিন্তা, ধুনীয়া নহ'লেও চিন্তা৷ গাড়ী যদি আছে পেট্ৰলৰ বৰ্ধিত দামকলৈ চিন্তা, ছোৱালীৰ বিয়াকলৈ চিন্তা৷ কেজিত পঢ়ি থকা ল'ৰাটোৰ ৰাইমচ মুখষ্ট নোহোৱাক লৈ চিন্তা, নাৰ্চাৰিত পঢ়ি থাকোতেই পিচলৈ ষ্টেণ্ড কৰিবনে নাই চিন্তা৷ কাষৰ ঘৰৰ ছোৱালীজনী কাৰ বাইকত বহি গ'ল সেইটোও চিন্তা, মুঠতে পুৱা সাৰ পোৱাৰ পৰা শুৱালৈকে সাংঘাটিক সাংঘাটিক বাৰে কুৰি বাৰতা চিন্তা৷

চিন্তা কৰি পাৰ নোপোৱা চিন্তা সমূহ কৰি কৰি আকৌ কিবা বেমাৰেই হ'ল নেকি মোৰ বুলি কৰাতো আকৌ তাতোকৈ ডাঙৰ চিন্তা৷ মুঠতে ক'বলৈ গ'লে চিন্তাই মানুহৰ মনটোক অনবৰতে ঘড়ীৰ কাঁটাডালৰ দৰে ব্যস্তই কৰাই ৰাখে৷

ইমান চিন্তাৰ মাজতো আকৌ কোনোবাই কাৰোবালৈ কেনে আছে, কিবা খালেনে নাই সেইটোও চিন্তা কৰে৷ ম'বাইলত লাষ্ট চিন নেদেখিলেও চিন্তা, ক'ল কৰি নাপালেও চিন্তা৷ দুদিনমান ভালদৰে কথা পতা নহ'লেও আকৌ নতুন কাৰোবাৰ পাল্লাত পৰিল নেকি চিন্তা৷ কাৰোবাৰ যদি কেতিয়ালৈ ডাঙৰ হম চিন্তা কাৰোবাৰ আকৌ বয়স বাঢ়িল নেকি চিন্তা৷

গডৰেজটো খুলি কোনজোৰ কাপোৰ পিন্ধিম সেইটো চিন্তা কাপোৰজোৰ পিন্ধি আকৌ ভাল লাগিছে নে নাই সেইটোও চিন্তা৷ মুঠতে চাৰিওফালে চিন্তা চিন্তা চিন্তা কেবল চিন্তা৷

নিলাক্ষীৰ চিন্তাই চিন্তাত পেলাই দিলে৷ চিন্তাৰ শেষ নাই সেয়ে আৰু অলপ চিন্তা কৰো৷ মইনো কিমান চিন্তা কৰিম সেয়ে আপুনিও চিন্তা কৰক৷ চিন্তাবোৰ ভগাই ল'লে বোলে ভাল৷ চিন্তা নকৰাকৈ কৰা কাম ভাল নহয়, সেয়ে আহক সকলোৱে চিন্তা কৰো৷ ভাল বেয়া এই সকলো চিন্তাৰ মাজতেই কিন্তু ভাল লাগে যেতিয়া কোনোবাই কয় "চিন্তা নকৰিবি মই আছো"......