ধনং দেহি ,ৰূপং দেহি, গুণং দেহি

যোৱাবাৰ পূজাৰ কথা ৷ এওঁ বোলে হেৰা ব’লা শৰাইখন দি আহোগৈ ।ঘৰৰ গৰাকী দুৰ্গামাই ফৰমান দিলে যেতিয়া এতিয়া স্বয়ং গৌৰী আহি মানা কৰিলেও যাবই লাগিব ।বহু দিনৰ মূৰকত ছুটি পাইছো গতিকে ভাল দৰে অলপ দেৰীলৈকে শুই ল’ম বুলি ভাবিছিলো, কিন্তু ন’হল । শ্ৰীমতীৰ ফৰমানৰ ক্ৰমিক নং অনুসৰি গা পা ধুই কলপাত, নাৰিকল সকলো কাটি মেলি তৈয়াৰ হৈ শৰাইখন লৈ পূজা থলি পালোগৈ ।
>>>>>>>>>>>>>>>>>>>>>>>>>>>>>>>>>

মানুহৰ ভিৰ , ঠেলা হেচাত মই এফালে এও এফালে । পূজাৰীয়ে মাইকত সেৱা এটা ল'ব লাগে বুলি ক'বলৈহে পালে ,ঠেলা হেচাই চুড়ান্ত ৰূপ পালে । নিজৰ দেহাটো ভিৰত এৰি দিলো, লগতে মহিলা সকলক অলপ নিজেই চাইড উলিয়াই দিলো পিছে অলপ পিছত লক্ষ্য কৰিলো পিছফালৰ পৰা মানুহৰ ভিৰ এটাই ঠেলি নি মোক কোনোবা ধুবুৰী পোৱালেগৈ । মোৰ পৰা দেৱী দুৰ্গা আৰু মোৰ গৰাকী কমেও বিশফুট দুৰত । নাই এই কথাই কথা নহয়, এই বাৰ মইও মান সন্মান কাটি কৰি মানুহ ফালি আগ বাঢ়িব ধৰিলো । এটা সময়ত সকলো মানুহ বহি দিলে, মইও ককালটো হেচুকি মেলি অলপ এডজাষ্ট কৰি চকুহাল জপাই সেৱা কৰাত লাগিলো ।মাজতে মোৰ পজিশ্যনটো ঠিকেই আছে নে নাই চাবলৈ বুলি চকু মেলিলো । দেখিলো মোৰ সন্মুখত প্ৰকাণ্ড তপিনা এটা, মানুহ গৰাকীৰ গেৰুৱা ফটা ভৰিত মোৰ মূৰটো লাগি আছে ।আৰু অলপ মূৰটো ডাঙিলো, নাই তপিনাটোৰ বাহিৰে একো নেদেখি, এই কথাই কথা নহয়, দেৱীয়ে মোক নেদেখিলে আশীৰ্বাদ দিব কেনেকৈ ? গতিকে দেৱীয়ে মোক দেখা পোৱাকৈ আঠু কঢ়াৰ দৰে অলপ উঠি দিলো ।দেখিলো মোৰ চৌ দিশে দেখোন কেবল মহিলাই মহিলা, হে হৰি মানে মই ঠেলি হেচি মহিলাৰ মাজত সোমালোগৈ ।ডিঙিত লোৱা গামোচা খনৰে মূৰটো সাউতকে ঢাকি আকৌ তপিনাটোৰ পিছফালে নিজকে লুকুৱাই দিলো ।
>>>>>>>>>>>>>>>>>>>>>>>>>>>>>>>>>>
দেৱী মাক ফৰমাইচ দিম বুলি যি কেইটা কথা ভাবি আহিছিলো সকলো পাহৰিলো ।যোৱাবাৰ পূজাৰীয়ে মন্ত্ৰ মাতি থাকোতে মনৰ কল্পনা বোৰ দেৱী মাৰ আগত ভাবি ভাবি ক’ব লগিয়া হৈছিল যাৰ বাবে আধা খিনি কবলৈ থাকোতেই পূজাৰীয়ে মন্ত্ৰ মতা শেষ কৰিছিল । এই বাৰ ভাবিছিলো পূজাৰীয়ে মন্ত্ৰ মাতি থাকোতেই সকলো কম ,গতিকে দুবাৰমান ঘৰতে আওঁৰাইও আহিছিলো বোলো “আই এইবাৰ গ্ৰেন্ড আই টেন এখন লবলৈ এওঁ খুব কৈ আছে গতিকে বাহিৰা দুপইচা যাতে ঘটিব পাৰো তাৰ বাবে ফুকনৰ টেবুলখনলৈ প্ৰমোশ্চনটো কৰি দিবা আৰু যেনে তেনে ।
ল’ৰাটো পঢ়াত ভাল নহয় জানাই তাতে এইবাৰ মেট্রিক দিব গতিকে ৰিজাল্টৰ দিনা যাতে ফোনটো বিজি কৰি থব লগিয়া নহয় তাৰ বাবে কিবা এটা মিৰাকল কৰিবা ।বেচিকৈ নোৱাৰিলেও চেকেন্ড ডিভিজনকে দিয়াই দিবা , মানুহক কৈ দিম আৰু বোলো পৰীক্ষাৰ আগত তাৰ অলপ গা বেয়া আছিল গতিকে ফাৰ্ষ্ট ডিভিজনলৈ দুই মাৰ্কচ কমিল ।
অ’ আৰু এটা কথা এওঁৰ আজি কালি মেক আপত বহুত টকা খৰছ হয়, মানে অলপ ৰিংকল পৰিছেটো , গতিকে হে ৰূপৰ অধিষ্টাত্ৰী দেৱী মোৰ এওঁক অলপ বিনা মেক আপত ঘৰৰ পৰা বাহিৰলৈ ওলাব পৰা কৰি দিব নোৱাৰানে ?
এই বাৰো আগফালৰ সেই বৃহৎকায় বস্তুটো দেখি সকলো পাহৰি থাকিলো, একো নোলাল মনৰ পৰা , তপিনাটোকে সেৱা এটা কৰি গুচি আহিলো । মানুহজনী বাৰু সেৱা কৰি উঠিব কেনেকৈ, মইয়ে ডাঙি দিব লাগিব চাগৈ এই বোৰ ভাবি থাকোতেই পূজাৰীৰ মন্ত্ৰ শেষ হ'ল ৷ দেৱীয়ে কি ভাবিলে নাজানো ৷
>>>>>>>>>>>>>>>>>>>>>>>>>>>>>>>>>
গামোছাখন মুৰতে ওৰণী দৰে লৈ ওলাই আহিছোহে এনেতে মাকৰ চাদৰৰ আচলত ধৰি থকা সৰু পুত্ৰই দেৱী গোসানিলৈ আৰু মোলৈ বহুসময় দাৰ্শনিকৰ দৰে নিৰীক্ষন কৰি এক প্ৰকাৰ চিঞৰি চিঞৰি মাকক কলে মা মা দেৱীৰ তলত ক'লা ৰঙৰ খালি গাৰে যে আংকলটো আছে আমাৰ দেতা নিচিনা ন' ৷ মা কচম সেইষাৰ কথা শুনা পিছত মাক জেগাতে অন্তৰ্ধ্যান হ'ল ৷ মইও কোবাকুবিকৈ পোৱালীৰ এটা হাতত ধৰি চোচৰাই ঘৰ পালোহি ৷

।।।।।।সৰ্ব মঙ্গল্য মঙ্গলায়ে শিৱে সৰ্বাৰ্থ সাধিকে শৰণ্যে ত্রায়েমবাকু গৌৰী নাৰায়নী নমস্তুতে।।।।।