পাতালপুৰিলৈ আপোনাক স্বাগতম.......

সকলোৱে গুৱাহাটি, যোৰহাটলৈ নিমন্ত্ৰন জনাই আছে, গতিকে মইনো মোৰ পাতাললৈ সকলোকে কিয়নো নিমন্ত্ৰন নিদিম৷ ৰ'ব পাতাল বুলি কওঁতে ভয় খাব নালাগে৷ অহাৰ আগতে পৌৰাণিক চৰিত্ৰ কেইটামানৰ লগত চিনাকি কৰি দিও ৷ ব্ৰহ্মাৰ পৰাই আৰম্ভ কৰিছো ৷
ব্ৰক্ষ্মাৰ পুত্ৰ মৰিচি
মৰিচিৰ পুত্ৰ কাশ্যপ ৷
কাশ্যপ আৰু দিতিৰ পুত্ৰ হিৰন্যকশিপু ৷
হিৰন্যকশিপুৰ পুত্ৰ ভক্ত প্ৰহ্লাদ ৷
প্ৰহ্লাদৰ পুত্ৰ বিৰোচন
বিৰোচনৰ পুত্ৰ বলিৰজা ৷
বামন অৱতাৰ হিচাপে বলিৰজাৰ পৰা তিনি পদ ভুমি বিছাৰিলে ৷ প্ৰথম পদত বামনৰুপি বিষ্ণুৱে স্বৰ্গ, দ্বিতীয় পদত মৰ্ত্য লৈ ললে ৷ তৃতীয় পদত একো বাকি নথকাত বলি ৰজাই নিজৰ মুৰ পাতি দিলে ৷ বামন অৱতাৰি বিষ্ণুৱে তেঁওৰ মুৰত ভৰি থৈ পাতালপুৰি পোৱালে ৷ কিন্তু বলি ৰজাৰ দানত সন্তুষ্ট হৈ বিষ্ণুৱে বলিৰজাক পাতালৰ অধিপতি পাতিলে আৰু তেঁওৰ পাতাল ৰক্ষা কৰি থাকিম বুলি প্ৰতিশ্ৰুতি দিলে ৷
বলি ৰজাৰ পুতেক বাণ বা বাণাসুৰ ৷ বাণাসুৰ আৰু কাণ্ডালাৰ জীয়ৰি উষা ৷ আৰু আগলৈ নাযাও৷ কথা হ'ল পিতৃৰ ৰাজ্যত পুতেক ৰজা হয় ৷ পাতালৰ অধিপতি বলিৰ পুতেক বাণ পাতালৰ ৰজা হল ৷ ৰাজধানী তেজপুৰ ৷ আপোনালোক সকলোকে প্ৰাগ- ঐতিহাসিক চহৰ পাতাললৈ স্বাগতম ৷ মোৰো ঘৰ ইয়াতেই ৷ পাতাললৈ এপাক আহক, লগ পাম ৷ হৰি হৰ যুদ্ধত সকলো অসুৰ তথা দৈত্যৰ মৃত্যু হ'ল,গতিকে নিৰ্ভয়ে আহক ৷
ইয়াত মাতাল হ'ব পৰাকৈ প্ৰকৃতিৰ সৌন্দৰ্য্য আছে, লগতে হাঁহি হাঁহি পগলা হৈ যাম বুলি কোৱা সকলোলৈকো চিকিৎসাৰ সু-ব্যৱস্থা আছে৷ কাৰেঙৰ লিগিৰীৰ পৰা কুৱঁৰী লৈকে সকলোৰে স্মৃতি বিজৰিত হৈ আছে৷ লুইতৰ পানী ইয়াতো বয়৷ তাৰ কাষতে থকা "পৰজনমৰ শুভলগনৰ" ৰচোঁতা জনৰ সমাধিত বহি আড্ডা দিম, নটসুৰ্যৰ পোহৰৰে আলোকিত হোৱা ৰংগমঞ্চত ক্ষন্তেক জিৰাম৷ অগ্নিযুগৰ ফিৰিঙতিৰ ঘৰৰ কাষেদি পাক এটা মাৰি জোনাকী যুগৰ ইতিহাস বিছাৰি "পকী"ত ভূমুকি মাৰিম৷ প্ৰাগ-ঐতিহাসিক যুগৰ হৰি-হৰ যুদ্ধৰে তেজৰে ৰাঙলী হোৱা উষা-অনিৰুদ্ধৰ প্ৰেমৰ কথা শুনি অগ্নিগড়ত বহি কবিতা ৰচিম অথবা দ্বিতীয় শতিকাৰ গুপ্তযুগৰ গংগা যমুনাৰ মুৰ্ত্তি চাই তৃপ্তি লভিম৷ পাৰিলে আহিব, হৰিবিলাস মুভিজৰ জয়মতীৰ প্ৰথম প্ৰদৰ্শনীৰ "জোনাকী" টকিজত বহিম অথবা বামুনী পাহাৰৰ শিলত বহি সুৰ্য্যাস্ত উপভোগ কৰিম৷ প্ৰকৃতিয়ে পৰিস্কাৰ কৰি থৈছে সৰু ঠাইকন, যদি পাৰে শীতৰ কুৱঁলী ফাঁলি পাতাললৈ বুলি আহি প্ৰকৃতিৰ বুকুত সকলো মিলি বনভোজ এটাৰ আয়োজন কৰক৷ সকলোলৈকে স্বাগতম জনালোঁ৷