ভাবুকৰামৰ মনৰ ভাৱ

হেৰি শুনিছে?

মই লেপটপটো জপাই চকীৰ পৰা উঠিব লৈছোহে, শ্ৰীমতী ৰুমলৈ সোমাই আহি চাহ কাপ টেবুলতে থৈ বোলে অতপৰে হেৰি হেৰি চিঞৰি আছো শুনা নাছিল নেকি?

মই বোলো হেৰা কিয় নুশুনিম , তুমি ইমান লাহেকৈ "হেৰি শুনিছে" বুলি মাতিছা যে ঘৰৰ আগেদি যোৱা মানুহ দুটামানেও ডিঙি মেলি চাই গৈছে৷

হ'ব হ'ব এতিয়া মোৰ মাতটোও বেয়া হ'ল, এটা সময়ত ফোনত "কিবা কোৱানা, তোমাৰ মাতটো শুনিবলৈকে ফোন কৰিছো" বুলি যে ঘন্টাৰ পিচত ঘন্টা ফোন কৰিছিল তেতিয়া হ'লে মোৰ মাতটো ঠিকেই আছিল৷ বিয়াৰ আগতেই যে "হেৰি শুনিছে" বুলি দিনটোত দহ বাৰ মাতিব দিছিল তেতিয়াও ঠিকেই আছিল, এতিয়া দুটা পোৱালীৰ মাক হলো নহয়, মোৰ মাত কথা সকলো বেয়া হ'ল৷

মই বোলো হেৰা তেনেকৈনো কিয় কোৱা?

এও বোলে দস্তুৰমত কম৷ নিদিষ্ট ফোন কেইটামান আহিলে যে আজিকালি আতৰি গৈ আমলখি গছৰ তলত কুলিৰ মাতৰে ফুচফুচাই থাকা, মই হ'বলা শুনা নাই? চুৱা পেলাবলৈ গৈ আন্ধাৰতে ফুচফুচ শব্দ শুনি ভুত বুলি ভয় খাই কিমান দিন চক খাইছো মইহে জানো আৰু মই কাষত থাকিলে যে এই ভোডাফোনৰ বিল, ৰং নাম্বাৰবোৰে ইমান আমনি কৰে, মইও জানো কোন সেইকেইজনী ৰং নাম্বাৰ৷

মই বোলো হেৰা পুৱাই পুৱাই তুমি এইসোপা চাহৰ লগত খোৱাবলৈকে হেৰা হেৰা চিঞৰি আছিলা নেকি?

নাই, সেইবাবে মতা নাছিলো, পিছে কি কথা ক'বলৈ আহিছিলো,তোমাৰ বেকা উত্তৰ শুনি পাহৰি থাকিলো৷

মই কিবা এটা ক'ব লৈছিলোহে এনেতে শ্ৰীমতীয়ে বোলে, অ' মনত পৰিল, তুমি এনেই বহি ম'বাইল পিটিকি থকাতকৈ মোক গুণোৎসৱৰ কাৰনে বনোৱা স্কুলৰ ৱাল মেগাজিনখনৰ বাবে টপিক কেইটামান ইন্টাৰনেটত চাই দিয়া৷

মই বোলো হেৰা ,ৱাল মেগাজিন বিদ্যালয়ৰ ল'ৰা ছোৱালীয়ে লিখে আৰু সিহঁতেই বনাই, তুমি আকৌ টপিক বিছাৰি কিয় লিখিব লাগে?

ক'বলৈহে পালো, শ্ৰীমতীয়ে বোলে গ্ৰেডৰ কথা আছে আৰু এল পি স্কুলৰ ল'ৰা ছোৱালীক নামটো লিখিবলৈ শিকাবলৈ এমাহ লাগে আৰু সিহঁতে কি ৱাল মেগাজিন বনাবহে?

মই বোলো কথাটো ঠিকেই কৈছা, পিছে এই যে ৰেজিষ্টাৰ বহী বোৰ আজি ইখন কালি সিখনকৈ কিনি আনি আনি লিখি আছা, সেইবোৰটো তোমালোকৰ কাম, সেইবোৰ আগতে মেইনটেইন কৰা নাচিলা নেকি?

শ্ৰীমতীৰ মুখলৈ চাই সাম্ভাব্য আগ্নেয়গিৰী উদ্গীৰনৰ উমান পাই মই বোলো ৰ'বা ৰ'বা মই ৱাল মেগাজিনৰ টপিক কেইটা চাই দিছো৷

লেপটপটো খুলি এবাৰ নিজৰ কথাও ভাবিলো৷ মই চাকৰিটোত জইন কৰাৰ পিছৰ পৰাই জানুৱাৰী মাহত নতুন বছৰৰ কেলেণ্ডাৰ খন মেলি লৈ প্ৰথমেই বন্ধ এইবছৰ কেইটা পৰিছে, শনিবাৰ ,ৰবিবাৰ সমূহতেই বন্ধ সমূহ পৰিছে নেকি বা কোনমাহত কেইটা বন্ধ,তথা ৰেষ্ট্ৰিকটেড হলিডে কেইটাও লগত মিলাই দীঘলিয়া ছুটি পাম নেকি ইত্যাদি বোৰ হিচাপ নিকাছ কৰি থাকোতেই বছৰটো যায়৷ কেতিয়াবা ভাবো মোৰ দৰে মানুহবোৰৰ বাবেই দেশখনে উন্নতি কৰিব পৰা নাই নেকি? নিশ্চয় নহয়৷ দেশ প্ৰগতিৰ পথত, প্ৰতিখন চৰকাৰে দেখোন কিমান উন্নতি কৰিলে ডাঙৰ ডাঙৰ হৰ্ডিং লগাই বিজ্ঞাপন দিয়েই থাকে৷

কেতিয়াবা ভাবো কৰ্ম সংস্কৃতিৰ অভাৱ হৈছে নেকি? আকৌ এবাৰ নিজৰ কথাকে ভাবিলো৷ দুপৰীয়া পোৱালীক কনভেন্টৰ পৰা ঘৰলৈ নিয়া, চাহ তামোল খোৱা আৰু সামগ্ৰীক অসমৰ পৰিস্থিতিৰ ওপৰত লগৰ বৰুৱা কলিতাহঁতৰ লগত পতা কথা সমূহ বাদ দিলে দহ বজাৰ পৰা পাঁচ বজালৈ দেখোন অফিছতে থাকো৷ টেবুলত ফাইলৰ দম লাগে কথাটো হয় পিছে অডিট আহিলে বা ইঞ্চপেকশ্চন আহিলে কামৰ প্ৰেচাৰে প্ৰেচাৰ কুকাৰৰ দৰে চিটি মাৰিলেটো গা নলৰা নহয়৷ গা তেতিয়া ল'ৰে, নহ'লেনো ঘৰলৈ মোনাত ভৰাই ফাইলবোৰ আনি ৰাতি দুপৰলৈকে অফিছৰ কাম কৰোনে? মনতে ভাবিলো কথাবোৰ৷
হ'বও পাৰে৷ চাকৰিত মাহেকীয়া টাৰ্গেট ফুলফিল কৰাৰ কথা নাথাকিলে আৰু কাম কৰিলেও নকৰিলেও পাঁচবছৰ চৰকাৰ চলাৰ দৰে ৰিটায়াৰ্ড নোহোৱালৈকে চলি থকা চাকৰিত মোৰ দৰে কেৱল এক তাৰিখ অহালৈ আৰু ইংক্ৰীমেন্টৰ হিচাপ নিকাচ কৰি জীয়াই থকা মানুহবোৰৰ জন্ম নিজে নিজে হয় নে পৰিস্থিতিয়ে জন্ম দিয়ে ভাবিলো৷ বন্ধবোৰে বাৰু কৰ্মস্পৃহা কমাইছে নেকি? বন্ধ বুলি কওতে আকৌ মনত পৰিল যোৱাবছৰ পূজাৰ ছুটি তেনেই কম হোৱা বাবে ক'তো ফুৰিবলৈ যোৱা ন'হল৷ এইবাৰ কেলেণ্ডাৰ মেলিয়েই হিচাপ নিকাচ এটা কৰি দেখিছিলো যে মাজৰ অফিছৰ খোলা বাৰ দুদিনত যদি কেজুৱেল লিভ লোৱা যায় দূৰ্গা পূজাৰ পৰা লক্ষ্মী পূজালৈকে পূজাৰ নামত নামত প্ৰায় এসপ্তাহ বন্ধ পাম গতিকে সকলো হিচাপ নিকাছ কৰি পূজাৰ বন্ধত মুম্বাই গোৱা ফালে ফুৰি আহিম বুলি নমামী উৎসৱৰ ব্যস্ততাৰ মাজতো সময় উলিয়াই ফ্লাইটৰ টিকটো কৰিছিলো, পিছে কি হ'ব মোৰ নমামী গ'ল কিন্তু শ্ৰীমতীৰ গুণোৎসৱ আৰম্ভ হ'ল৷

উৎসৱ বুলি কওঁতে মনত পৰিল আজি কালি চৌদিশে উৎসৱেই উৎসৱ৷ উৎসৱ মানেই আনন্দ৷ আনন্দ মানেই সৰ্বানন্দ, সকলোৰে আনন্দ৷ উৎসৱ বুলি কওঁতে এই যে শাৰদীয় দুৰ্গোৎসৱ,ইয়াত দেৱী পূজাভাগ কমিটিৰ আয়োজক সকলৰ বাবেহে যেন লাগে বাকি আপোনাক কোনেও নুশুধে যে পূজা দিব যাব বা কি দৰে পূজা ভাগ পাতিব কিন্তু সকলোৰে প্ৰায় এটাই প্ৰশ্ন পূজাৰ বন্ধত ক'ৰবাত ফুৰিবলৈ যাব নেকি? পূজাত কি কাপোৰ ল'লে? নতুন ডিজাইনৰ কি কাপোৰ আহিছে, কোনটো মণ্ডপত ডেকৰেশ্চনত কিমান খৰচ কৰিছে, কোনে কিমান ডনেশ্চন দিলে, কলিকতাৰ পৰা কোন খন কমিটিয়ে গায়ক মাতিছে, ডি জে নাইট থাকিব নেকি? মনতে ভাবিলো, পূজা মানে কেৱল জাকজমকতাই নেকি?
কান তাল মৰা হিন্দী গীতৰ লগত মাজে মাজে ঔম জয় জয় জগদিশ মাতা আৰু মাইক্ৰফ'নৰ আগত গোৱা মন্ত্ৰধ্বনীয়ে মিশ্ৰিত হৈ কৰ্ণপতহত খুন্দা মাৰি মনতো পূজা পূজা লগাই দিয়ে যদিও পূজা চাবলৈ বুলি ওলায় গৈ চাব কি? পূজা মানে পেণ্ডেলৰ ডিজাইন, লাইটৰ ডেকৰেচন, প্ৰতিমাৰ কন্টেষ্ট, মানুহৰ ভিৰ, নতুন কাপোৰৰ ডিজাইন আৰু লগতে বাহিৰতে ডিনাৰ ইমানেই৷ তাৰে এদিন যেনিবা যেনতেন দিনত কৰবাত শৰাই এখন৷

বাৰু যি কি নহওঁক উৎসৱ পাৰ্বননো কাৰ ভাল নালাগে৷ সৌ সিদিনালৈকে দুই তিনিদিনলৈকে গাত পানী এটোপাল নধলাকৈ থকা তথা ভগৱান বুলিলে সাতজাপ মৰা দুই এজনে আকৌ আজি কালি বেদ পুৰান উপনিষদৰ উদ্ধৃতি নিদিয়াকৈ কথাই নকয়৷ ইয়াক আপুনী মেজিক বুলিও ক'ব পাৰে বা পৰিবৰ্তন বুলিও ভাবিব পাৰে৷ ভালেই হৈছে, বেয়া হৈছে বুলি নকও ধৰ্মৰ প্ৰতি শ্ৰদ্ধা ভক্তি আগ্ৰহ থাকিব লাগে ৷

শ্ৰদ্ধা ভক্তিৰ কথা মনলৈ অহাত ভাবিলো আগতে নেৱালী নাৰ্জী ফুল গোটাই মালা গাঠি দেৱীক সন্তুষ্ট কৰা আৰু স্কুলৰ খিচিৰি খোৱাই আছিল স্বৰস্বতী পূজা কিন্তু এতিয়া বিউটি পাৰ্লাৰত ভিৰ কৰা আৰু পূজাৰ দিনা দেৱীক দেউৰ মন্ত্ৰ শুনিবলৈ এৰি দি সাজি কাচি গৈ টিভিৰ কেমেৰাৰ আগত ঠিয় হোৱাতোহে বচৰেকীয়া উৎসৱত পৰিনত হৈছে৷ বিশ্বকৰ্মা পূজাত এতিয়া দেউ নহলেও কথা নাই কিন্তু ডি জে লাগিবই৷ অখণ্ড ভাগৱত পাঠৰ কথা নকলোৱেই বা৷ কেতিয়াবা ভাবো এই মাইক লগাই গোটেই নিশা পাঠ কৰা ভাগৱতৰ কথা কেইজনে শুনে বা বুজে?

কেতিয়াবা কথাবোৰ অকলেই ভাবি থাকো, ভবাৰ বাহিৰে কৰিমনো কি? ভগবানে আমাক মূৰটো ঠিকেই ভাৱিবলৈকে দিছিল পিছে ভৱা কথাবোৰ আকৌ বাস্তবত কামত কিমান খটাও সেইটো আকৌ আমাৰ মনুষ্য জাতিৰ হাতত এৰি দিলে নহয়৷

এনেতে ফেচবুকত টং কে নটিফিকেশ্চন এটা আহিল৷ খুলি চাই দেখো শ্ৰীমতীয়ে এডৰা দীঘল ষ্টেটাচ এটা পষ্ট কৰিছে৷ মোৰ দীঘল পষ্ট পঢ়াৰ ধৈৰ্য কম, সেয়ে উপৰে উপৰে চকু ফুৰাই চাই দেখিলো জীৱ হত্যা মহাপাপ জাতীয় পষ্ট৷ মোক স্কুলৰ কামত লগাই নিজে ফেচবুকত ব্যস্ত শ্ৰীমতীৰ পষ্টটো দেখি মিটাৰটো উঠি আহিছিল যদিও বলে নোৱাৰা শিলক পৰি নমস্কাৰ বুলি কথা এষাৰ আছে নহয় সেয়ে নিজকে সম্বৰন কৰিলো৷ মই লাহেকৈ উঠি গৈ বোলো হেৰা আজি দেওবাৰৰ দিনৰ সাজ কি খাবা মাছ নে মাংস? এও বোলে মাংসই আনা৷ আকৌ ভাবিলো মোৰ শ্ৰীমতীওটো কম নহয় জীৱ হত্যা বন্ধ কৰিব লাগে বুলি ষ্টেটাচো দিব আৰু ৰবিবাৰ বুলিয়েই দুপৰীয়া মুৰ্গীৰ ঠেঙো টানিব৷ মই মানুহটো আকৌ ভাবুকৰাম হৈ পৰিলো৷