চৌদিশে এতিয়া এটাই শব্দ "পানী"

পানী ...পানী.... পানী ৷ মুঠতে চাৰিওফালে পানী ৷ ৰ'ব পানী পানী বুলি মই য়ৌ য়ৌ হনী সিংৰ গানটো গাব খোজা নাই ৷ অসমৰ গোটেইসোপা পানী একেলগ কৰি কিবা এটা লিখিবহে ওলাইছো ৷ ক'ৰবাত যদি বানপানী আৰু চকুপানী ক'ৰবাত আকৌ জিভাৰ পানী আৰু ঘৰিয়ালৰ চকুপানী ৷ মুঠতে পানী আৰু পানী ৷
বাৰু, আমি জানো যে পানীয়েই জীৱৰ প্ৰাণ ৷ ৰ'ব ৰ'ব, পানী বুলি কওঁতে আকৌ মই সন্ধিয়াৰ ফুৰ্টি পানীকনৰ কথা হে ক'ব ওলাইছো দেই ৷ যি কন নাখালে বহুতৰে প্ৰাণ বায়ু উৰি যাব যেন লাগে সেইকনৰ কথাহে , নৰ্মেল পানী মানে টিউবেল, কুঁৱা, পুখুৰী এইবোৰ পানীৰ কথা কোৱা নাই ৷ বানপানীৰ কথাটো মুঠেও নকওঁ কাৰন বানপানী আমেৰিকাতো হয় ৷ সেইটোনো কি ডাঙৰ কথা ৷
যিয়েই নহওঁক কিয় পানী পানীয়েই, লাগিলে সি কলহৰ পানীকনেই হওঁক বা বিলাতি পানীকনেই হওঁক৷ বিলাতি পানীৰ কথা ওলাল যেতিয়া বহুতৰে যে জিভাৰ পানী ৰখাব নোৱাৰা অৱস্থা হৈছে অমুকাইও বুজিব পাৰিছো ৷ সন্ধিয়া হ'লে যে আড্ডাত নৰ্মেল পানীৰ লগত বিলাতি পানী মিক্স হৈ ডিঙি পাৰ হোৱাৰ পিছতেই পাক খোৱা জিভাৰ কথাই জাতিয়তাবাদ- ৰাষ্ট্ৰীয়তাবাদৰ পৰা ডাইৰেক্ট গৈ হোৱাইট হাউচ পাইগৈ সেইটো নক'লেও সকলোৱেই জানে ৷
সঁচা কবলৈ অসমত এই পানীকনেই এনে এক বস্তু যাৰ কাহানিও সমস্যা হোৱা নাই ৷ প্ৰতিটো চাৰিআলিত কিম্বা দুইৰ পৰা দহ কিলোমিটাৰ ভিতৰত ফাৰ্মাচি নাপালেও ফুৰ্টি পানীৰ দোকান যে আপুনি পাব গেৰান্টি ৷ শইকীয়াৰ দিনৰ পৰা বুলি আমাৰ মহন্তদেউৰ দিনলৈকে অসমত যিমান ফুৰ্টি পানীৰ দোকানৰ লাইচেঞ্চ দিলে আৰু চৰকাৰে যিমান ৰাজহ এই পানীকনৰ পৰাই সংগ্ৰহ কৰে, চাবলৈ গ'লে অসমত যে কাহানিও ফুৰ্টিপানীৰ সমস্যা নহয় সেইটো ধুৰুপ ৷
যি কি নহওক বিহাৰৰ দৰে পানীৰ সমস্যাত জুৰুলা হোৱা ৰাজ্যইও ফুৰ্টিপানী বন্ধ কৰাৰ পৰিবৰ্তে আমাৰ অসমৰ বোকাপানীত ফুলা নতুন চৰকাৰে ড্ৰাই ডে কমাই আনি অতিৰিক্ত চাৰিশ কোটি টকা পানীকনৰ পৰাই ৰাজহ আদায় কৰাৰ যি পৰিকল্পনা কৰিলে সিও লেখত লবলগীয়া ৷
"সুৰাই একমাত্ৰ ইশ্বৰ প্ৰাপ্তিৰ পথ নহয়" বুলি দিয়া বিজ্ঞাপনকো বহু চকু চৰহাই আকৌ বুজিয়েই নাপালে ৷ প্ৰকৃততে বুজাব বিচাৰিছিল যে সুৰাই এক্সিডেন্টলি ভায়া জি এন আৰ চি হৈ ডাইৰেক্ট ঈশ্বৰ প্ৰাপ্তি কৰিব পাৰে বা দীৰ্ঘদিনীয়া সুৰা ভক্তিৰ ফলত ভায়া ভেলোৰ হৈ ঈশ্বৰ প্ৰাপ্তি ঘটাব পাৰে ৷
যি কি নহওঁক "ভিতৰৰ অফিচাৰ জনক জগাই তোলক"ৰ বিজ্ঞাপনৰ দৰে পানী এটুপি ধৰি বহুতৰে সন্ধিয়া হ'লেই যে ভিতৰৰ মতা মানুহটো জাগি উঠে আৰু ইংৰাজী ভাষা আখৈ ফুটাদি ফুটে সেইটো সৰ্ব্বজন বিদিত ৷ পানী কেঁচুৱা এটাইও জানে যে অসম পানীতে ডুবি থাকে ৷ এই ধৰক বানপানী, চাহপানী, সাজপানী, লাওপানী ইত্যাদি ইত্যাদি ৷ বিশেষকৈ গৰমৰ বন্ধত অসমৰ আধাফাল ডুবি থাকে বানপানীত আৰু আনফাল এক'লেণ্ডৰ পানীত ৷ বিচিত্ৰ জীৱন বিচিত্ৰ মন ৷

আটাতকৈ ডাঙৰ কথা যে পানীয়ে কেতিয়াবা হাঁহিৰ খোৰাকো যোগায় ৷ উদাহৰন স্বৰূপে পানীৰে পৰিপূৰ্ণ অসমৰ এল পি স্কুলবোৰত বৰষুনৰ পানী সংৰক্ষন কৰাৰ নামত লাখ লাখ টকা চৰকাৰে পানীত পেলোৱা কাণ্ড কাৰখানা বোৰ দেখি অথবা বছৰৰ পিছত বছৰ ধৰি ব্ৰহ্মপুত্ৰ কন্ট্ৰল বৰ্ড আৰু গুৱাহাটীৰ কৃত্ৰিম বানপানী সমস্যা সমাধানৰ নামত সাধাৰন মানুহক জোলোকা জোলোকে পানী খোৱাৰ কথাবোৰ দেখি শুনি কেতিয়াবা ভাবো এই পানীত পৰা মানুহবোৰক দেখি ঘৰিয়ালৰ চকুপানী টুকা নেতা সকলোটো কম অভিনেতা নহয় ৷

চৰাই মৰে ৰৈ মানুহ মৰে কৈ ৷ আৰু এবিধ পানীৰ কথা ক'বলৈ পাহৰিছিলোৱেই ৷ মানে পাণি গ্ৰহন কৰা কথা ৷ এই বিধ পাণি আকৌ ইমান এভেলভেল নহয় ৷ যি কোনো এজন বৰলাক সোধক গম পাব যে পাণি গ্ৰহন কৰিবলৈ ছোৱালী বিচৰাটো কিমান কষ্টকৰ ৷ আতুৰে পানী পাই যাব পাৰে কিন্তু বৰলাই পাণি গ্ৰহন কৰিবলৈ ছোৱালী পোৱাটো ভাগ্যৰ কথা ৷