ভগৱান দৰ্শন

আপুনি বাৰু ভগৱান বিশ্বাস কৰেনে? যদি কৰে ভগৱান দেখিছেনে? ৰঙা কাপোৰৰে মেৰিয়াই থপনাত থোৱা শাস্ত্ৰ ভাগত বা মাটিৰে বা মাৰ্বলৰে নিৰ্মিত মুৰ্ত্তিত ভগৱান আছেনে? নাজানে নহয় জানো? মইও নাজানো কিন্তু বিশ্বাস কৰো, নহয় জানো? বাৰু আহকচোন আজি ভগৱানক দৰ্শন কৰো ৷
ৰ'ব প্ৰথমে আমি ভগৱান শব্দটোৰ অৰ্থ বুজিবলৈ চেষ্টা কৰো ৷
ভ= ভূ বা ভূমি
গ= গগন বা আকাশ
ব= বায়ু
অ= অগ্নি
ন = নীৰ বা পানী
অৰ্থাৎ পৃথিৱী, আকাশ, বায়ু, অগ্নি, আৰু পানী এই প়ঞ্চ তত্বৰে সকলো সৃষ্টি গঠিত হৈছে ৷
সংস্কৃত ভাষাত "ভগ" মানে ঐচৰ্য্য আৰু "ৱান" মানে অধিকাৰি বা স্বামী ৷ অৰ্থাৎ সকলো ঐচ্ৰৰ্য্যৰ অধিকাৰী ভগৱান ৷ এই পঞ্চতত্বৰ অধিকাৰী ভগৱান আৰু এই পঞ্চ তত্বৰে আপোনাৰ মোৰ সকলো জীৱ জড়ৰ দেহ গঠিত ৷
গীতাত স্ৰয়ং শ্ৰীকৃষ্ণই অৰ্জুনক কৈছে
মম য়োনিৰ্মহদ ব্ৰৰ্ক্ষ্ম তশ্মিন গৰ্ভং দধাম্যহম ৷
সম্ভৱঃ সৰ্বভূতানাং ততে ভৱতি ভাৰত ৷৷
অৰ্থাৎ হে অৰ্জুন সমুহ জড় পদাৰ্থৰ সমষ্টিয়েই হ'ল ব্ৰক্ষ্ম আৰু ব্ৰক্ষ্মই হল মোৰ গৰ্ভাধানৰ স্থান ৷ সেই ব্ৰক্ষ্মতেই মই মোৰ বীজ নিক্ষেপ কৰো আৰু তাৰ পৰাই সকলো জীৱই জন্ম লাভ কৰাতো সম্ভৱ হয় ৷
অৰ্থাৎ অজৈৱ যৌগত ভগৱানে বীজ বা জীৱনি শক্তি প্ৰদান কৰে আৰু জীৱৰ সৃষ্টি হয় ৷ বিজ্ঞানেও কৈছে জীৱ আৰু জড়ৰ দেহ একে খিনি মৌলৰেই গঠিত ৷
গীতাত পুনৰ শ্ৰীকৃষ্ণই কৈছে
য়ত প্ৰবৃত্তিৰ্ভূতানাং য়েন সৱমিদং ততম
স্বকৰ্মাণা তমভ্যৰ্চ্য সিদ্ধিং ৱিন্দতি মানৱঃ৷৷
অৰ্থাৎ যাৰ পৰা সকলো প্ৰাণীৰে উৎপত্তি হৈছে , যি জন এই সকলো বস্তুতে ব্যাপি আছে সেই ভগৱানৰ হকে কৰ্মৰ দ্বাৰা সেৱা আগবঢ়ালেহে সিদ্ধি লাভ কৰিব পাৰি ৷
ঈশ্বৰ সৰ্বভূতানাং হৃদ্দেশেহৰ্জুন তিষ্ঠতি ৷
ভ্ৰাময়ন সৰ্বভূতানি য়ন্ত্ৰাৰূহানি মায়ায়া ৷৷
অৰ্থাৎ হে অৰ্জুন ভগৱান প্ৰতিজন জীৱৰে হৃদযত বা আত্মাত বাস কৰে ৷ জড় শক্তিৰ বা মাযাৰ দ্বাৰা নিৰ্মিত এটা যন্ত্ৰত জীৱক বহুৱাই সিহঁতক ঘুৰাই লৈ ফুৰাইছে ৷
গুৰুজনাই কৈছে " কুক্কুৰ শৃগাল গৰ্ধৱৰো আত্মাৰাম জানিয়া সৱাকো কৰিবা প্ৰণাম" ৷ সৰ্ব ব্যাপি ইশ্বৰ, কেনেকৈ আৱাহন কৰিবা ক'ত বিশৰ্জন কৰিবা? মাধৱ গুৰু জনাই ঘোষাত লিখিছে " নাজানোহো আৱাহন নাজানোহো বিসৰ্জন, পূজা মন্ত্ৰ নাজানোহো কিঞ্চিত, এতেকে পৰমেশ্বৰ দাস ভৈলো চৰনত " ৷

আপুনি যদি ভাবিছে ভগৱানৰ চাৰি খন হাত, দহটা মুৰ আছে, স্বৰ্গত বাস কৰে তেনেহলে আপুনি ভূল কৰিছে ৷ কিয় ভগৱানক চাৰিবেৰৰ মাজত আৱদ্ধ মুৰ্ত্তিত বিছাৰি আছে? প্ৰতিটো জীৱৰ দেহত বিছাৰক, আত্মাত বিছাৰক, বিছাৰি নিশ্চয় পাব ৷ তেঁওৰ পৰা কিয় অলৌকিকতা কামনা কৰিছে? মৃত্যুৰ দুলাৰদলিত থকা জীৱটোৰ দীৰ্ঘায়ু কামনা কৰিছে, পৰিক্ষাত সফল হবলৈ শৰাই দিছে, নিজৰ পাৰ্থিব সুখৰ বাবে ভগৱানে অলৌকিকতাৰে আপোনাৰ কথা শুনি আপোনাৰ সমস্যা শুনি আপোনাক উদ্ধাৰ কৰিব বুলি ভাবিছে? মই পানি একাজলি দি পূজা কৰিছো আৰু আপুনি লিটাৰে লিটাৰে গাখীৰ ধালিছে, কাৰ ইচ্ছা বাৰু ভগৱানে পূৰন কৰিব? ভগৱান ইমান স্বাৰ্থপৰ নে?
এই শুকান মাটিত এটা গছৰ গুটি কেনেকৈ এজোপা গছ হয়? নিৰ্জীৱ পদাৰ্থত জীৱনী শক্তি কেনেকৈ লাভ কৰে? এই বাযু হিছাপে কোন বৈ আছে যি বায়ু নহলে আমি জীয়াই থাকিব নোৱাৰো ৷ পানী হিচাপে কোনে আমাৰ পিয়াহ দুৰ কৰিছে , যাৰ অবিহনে জীৱন অসম্ভৱ ৷ এই সকলো ব্যাপি ভগৱান আছে, প্ৰকৃতিক প্ৰেম কৰক, দেখিব সকলোতে ভগৱান আছে ৷ ৷ ৷ ৷