স্বাধীনতা আহি আছে

ৰ'ব, ৰ'ব স্বাধীনতা নামৰ ছোৱালী বা মহিলা অহাৰ কথা কোৱা নাই ৷ দিৱসৰ কথাহে কৈছো ৷
সৰুৰে পৰা অমুকাই স্বাধীনতা দিৱস বুলিলে চৰকাৰী, বেচৰকাৰী বা বিভিন্ন দল সংগঠন সমূহে ঘোষনা কৰা এটা বন্ধৰ দিন বুলিয়েই ভাবি আহিছিলো ৷ কিয়নো অমুকাৰ শৈশৱ আলফা, বিদেশী খেদা আন্দোলন, তিৰাশীৰ নিৰ্বাচন , নব্বৈ দশকৰ বজৰং, ৰাইন' অপাৰেচন তথা এবাৰ হাত, এবাৰ হাতী পাৰ্টিৰ চৰকাৰ গঠন, তাৰ মাজে মাজে ৰাষ্ট্ৰপতি শাসন ইত্যাদি দেখি শুনি পাৰ কৰা যৌৱন ৷ বিশ্বাস কৰক স্বাধীনতা কি পাহৰিয়েই থাকিলো ৷
ঘৰৰ পৰা ওলাবলৈকো ভয়, ক'ত বা গ্ৰেনেড এডাল দৌৰ মাৰি আহি ধমহ কৈ ফুটি অমুকাৰ স্বাধীনতা চাৰিজনৰ কান্ধত উঠে ৷ সেয়ে ঘৰতে বহি পুৱাই টিভি নামৰ বাকচটো খুলি পতাকা উত্তোলনৰ কাৰ্যসূচী চাই ডাঙৰ ডাঙৰ নেতা সমুহৰ ব্যক্তিগত সচিব সমুহে প্ৰস্তুত কৰা আৰু নেতা পালি নেতা সমূহৰ দ্বাৰা পৰিবেশন কৰা ভাষণ নামৰ অখাদ্য সমূহ কাণেৰে গুজি দুপৰীয়া দেশপ্ৰেম মূলক চিনেমা এখন উপভোগ কৰো ৷ আচৰিত কথা যে আজিলৈ যিমান হিন্দী চিনেমা চালো শত্ৰুদেশ কিন্তু সদায় চুবুৰীয়া দেশ পাকিস্থান হে হয় ৷ ইয়াৰ পিছত আকৌ চৰকাৰে কয় দুয়োখন দেশৰ মাজত সম্বন্ধ স্থাপন কৰিবলৈ চেষ্টা কৰিব লাগে ৷
যি কি নহওক আমাৰ দেশৰ সৈনিকে ছহিদ বৰণ কৰি দেশক উদ্ধাৰ কৰে গতিকে মনতো গৰ্বিত হয় আৰু সেইদিনা ইমান দেশপ্ৰেম জাগ্ৰত হয় যে কোনোবা দিনা নিজেই সৈনিক হৈ গোটেই শত্ৰু দেশখনকে যেন গুলিয়াই গুলিয়াই ফুটা চালনী বনাই দিম তেনেকুৱা লাগে ৷
কিন্তু, পিছ মুহুৰ্ততে ভাবো অহিংসাৰ পূজাৰী জাতিৰ পিতা গান্ধীজীয়ে বেয়া পাব ৷ পালেও পাওঁক আজি কালি তেওঁক " জানতে টো চব হে পৰ মানতে কিতনে হে? " জাতিৰ পিতা নামাকৰনত প্ৰশ্নবোধক চিহ্ন লগাটো দুৰৈৰে কথা বহুতে টো ধূৰ্ত বেপাৰীয়েই আখ্যা দি পেলালে ৷ বাৰু ৰাজনৈতিক ইচ্ছ্যু বাদ দিলো ৷
মুঠতে গান্ধী এতিয়া ক'লা ধন হিচাপে চুইচ বেংকৰ কোনোবা কুঠৰীত বন্ধ ৷ তেওঁক ঘুৰাই আনিব বুলি দেখা পৰিবৰ্তনৰ ৬০ দিনীয়া সপোনটোৰো ম্যাদ উকলিবলেই হ'ল ৷ বিলাতী বস্তু বিসৰ্জন, মদ বিসৰ্জন কৰিব দিয়া গান্ধীজীক তেওঁৰ হাঁহি থকা ফটো সন্নিবিষ্ট টকাৰে হলিউদৰ চিনেমা চাই, ইম্পৰটেড ড্ৰেচ পিন্ধি বিলাতী সুৰা কিনাত ব্যস্ত আজি দেশৰ জনগন ৷
বাৰু সেইবোৰো বাদ দিলো ৷ কি কৰিব, এই বিদেশী জুকাৰবাৰ্গজনৰ কৃপাতে চাঞ্চ পালেই ফটা লেকচাৰ মৰা আৰু হকে বিহকে বিতৰ্ক কৰি টাইম পাচ কৰা এটা অভ্যাসেই হৈ গৈছে আৰু ৷
বাৰু আকৌ টপিকলৈ আহো ৷ জনা শুনা হোৱাৰে পৰা স্বাধীনতা মানে এটাই শব্দ মনলৈ আহে আৰু সেইটো হ'ল "চেকিং" ৷ এক আগষ্ট মানৰ পৰাই আপুনি বাইক চলাওতে হেলমেট পৰিধান কৰিব ( বাকী দিনত ইমান কথা নাই বাৰু) লাইচেঞ্চ, পলিউচন, ৰেজিষ্ট্ৰেচন ,ভোটাৰ কাৰ্ড, আই কাৰ্ড পাৰিলে ৰেচন কাৰ্ড সকলোবোৰ টোপোলা এটাত বান্ধি ডিঙিত ওলমাই লৈ ফুৰিব লাগিব ৷ নহ'লে কোন সময়ত আপোনাৰ মানিবেগ পাতলহৈ যাব টলকিবই নোৱাৰিব ৷
গাড়ী নিলেতো হ'লেই আৰু ৷ কৰবাত ফুৰিবলৈ যাবলৈকো টোপোলা টাপলি নিবলৈকো ভয় ৷ শাওণ মাহৰ বলবম শেষ হলেও " ব'ল' বম কাহা হে " বুলি আপোনাৰ টোপোলা খুলি খুলি হাজাৰবাৰ চেকিং কৰিব ৷
বাছত যাম বুলি সপোনতো ভৱা অনুচিত, কিমান ঠাইত বাছৰ পৰা নমাই খোজ কাঢ়িব লাগিব ঠিক নাই ৷ এতিয়া সেই দিনবোৰ মনত পৰিলে ভাবো, স্বাধীনতা বাৰু সঁচাই আমাৰ জন্ম চৰ্ত অধিকাৰ নে ?

অ' আৰু এটা কথা কবলৈ পাহৰিয়েই গৈছিলো আপুনি বা আপোনাৰ পত্নীক যদি ড্ৰাইভিং শিকাব মন কৰিছে আজিৰ দিনতটোতকৈ ভাল দিন আৰু উদং ৰাজপথ আপুনি কাহানিও নাপাব ৷ এই ক্ষেত্ৰত কিন্তু স্বাধীনতাৰ মজা লওক ৷ পাৰিলে ক্ৰিকেট বেট খনো ওলিয়াই লব পাৰে, ৰাজপথতকৈ ভাল ফিল্ড ক'ত পাব?

বাৰু পুৰণি কথা বাদ দিলো, স্বাধীনতাৰ কথা কওঁতে মনত পৰিল স্বাধীনতা বুলি কিবা এটা যে বস্তু আছে বিবাহিত সকলে যেন ভুলতেও নাভাবে দেই, কৈ থ'লো ৷ কাৰন বিবাহ নামৰ জাকজমকীয়া অনুষ্ঠান পাতি সেই দিনাই আপুনি ৰাজহুৱা ভাবে স্বাধীনতাক ত্যাগ কৰিলো বুলি ঘোষনা কৰি থৈছে ৷
তথাপিও যদি আপোনাৰ বৰকৈ স্বাধীনতাৰ সোৱাদ ল'বলৈ মন কৰিছে শ্ৰীমতিৰ পৰা বিশেষ জৰুৰি কালিন পাৰমিচন লৈ লগৰ কেইজনমানৰ লগত ঘৰৰ চাদত বহি তিন পাত্তি, জ্বলা চানা আৰু আগতিয়াকৈ যোগাৰ কৰি থোৱা পানীয়কনৰ সোৱাদ ল'ব পাৰে ৷ আগতিয়াকৈ আনি থোৱা নাই যদি এতিয়া গৈ লৈ আনক ৷ ড্ৰাই ডে? ধেৎ আনদিনা কেৱল সুৰাৰ দোকানত সুৰা পোৱা যায় পিছে ড্ৰাই ডে'ত সকলোতে পায়, আনকি গেলামালৰ দোকানতো ৷
পিছে ফূৰ্টি পানীকন ডিঙিত পেলাই পত্নীৰ ওচৰত বৰমতা নোলাব ৷ আজিও আগৰ দৰে মেওঁ হৈয়ে থাকিব কিন্তু, নহলে কোন সময়ত আপোনাৰ পত্নীৰ গাত গোঁসানী লম্ভিব আৰু আপোনাৰ স্বাধীনতা গৈ গছত উঠিব আপুনি তলকিবই নোৱাৰিব ৷ গতিকে সাৱধান ৷ পিছত অমুকাক দোষ নিদিব ৷

আপুনি ভাবিছে এই দিনতো মই কেনেকৈ উদযাপন কৰো ৷ মোৰ নো আৰু কি, দেশৰ সাধাৰন এজন নাগৰিক হিচাপে দেশৰ বাবে যি কৰিব লাগে ফেচবুকতেই কৰো ৷ পুৱাই উঠি কোনো নুঠাৰ আগতেই গুগুলৰ পৰা বিচাৰি তিৰংগাৰ ফটো এখন ডাউনল'ড কৰো আৰু ভাল কেপচন এটা দি ফেচবুকত পোষ্ট কৰো ৷ তাৰ পিছত গালত শ্ৰীমতিয়ে ফেব্ৰিক কৰিবলৈ অনা ৰঙৰ টেমা কেইটা খুচৰি এখন গালত তিৰংগা আঁকি চেল্ফী দিও ৷ বচ হৈ গ'ল মোৰ দেশ প্ৰেম ........