পিকচাৰ অভি বাকি হে মেৰে দোষ্ট ....

পেলেক চন বৰি, অৰ্থাৎ পুলক চন্দ্ৰ বৰা, আমি মৰমতে পেলেক বুলি মাতো । তাৰো এটা কাহিনী আছে, ক্লাচ ফাইভত পঢ়ি থাকোতে ইংৰাজি শিক্ষক সোমেন্দ্র শৰ্মা চাৰে বৰ্ডত পুলকৰ নামটো লিখিব দিছিল । ভয়ত কঁপা কঁপা হাতেৰে ইংৰাজি ভাৱেল বোৰ আগ পিছ কৰি সি যি লিখিলে সেইটো নামৰেই পুলক চন্দ্ৰ বৰা বিখ্যাত হৈ পৰিল “পেলেক চন বৰি” হিচাপে ।
সি অবশ্যে বেয়া নাপায়, তাৰ মতে নামটো হেনো হলিউদ চিনেমাৰ ডাইৰেক্টৰৰ লগত মিল আছে ।যি কি নহ’ওক কিয় পেলেকে কিছুদিন আগত হিন্দী চিনেমাৰ দৰে অসমীয়া চিনেমা এখন বনাবলৈ যো যা কৰিছিল । তাৰ বাবে ৮০ ৰ দশকৰ হিন্দী চিনেমাৰ ওপৰত এক গভীৰ ৰিচাৰ্ছ কৰি তলত উল্লেখ কৰা সিদ্ধান্ত সমুহত উপনিত হৈছিল । ৰিচাৰ্চ পেপাৰ খনৰ কিছু অংশ আছিল এনেধৰনৰ

১। হিন্দী চিনেমাৰ নায়ক বি পি এল কাৰ্ডৰ সদস্য আৰু মাকে চিলাই মেছিনত কাপোৰ চিলাই কৰি হিৰো’ক ডাঙৰ-দীঘল কৰে । মাজে মাজে দেউতাকৰ ফুলৰ মালা আঁৰি থোৱা ফটো খন দেখুৱাই দৰ্শকৰ পৰা আৰু সহানুভুতি আদায় কৰে ।

২। নায়ক-নায়িকা জনশূন্য পথেৰে ৰাতি অকলে আহি আছে যদি, সাবধান বিজুলী ধেৰেকণিৰে প্ৰচন্ড বৰষুণ অহাৰ সম্ভাৱনা আছে ।

৩। দুটা ফুল বতাহত গাত গা লাগি হালি আছে যদি, আপুনি যি বুজিছে, শুদ্ধই বুজিছে ।

৪। প্ৰতি গৰাকী নায়ক-নায়িকাৰ সংগীতৰ ডিগ্ৰী লোৱা থাকে, যাৰ বাবে সকলো চিনেমাতেই গান গাব পাৰে। গানৰ সুৰ আৰম্ভ হ’ল মানে আপুনি গম পাব তেঁওলোক এতিয়া নদীৰ পাৰলৈ দৌৰ মাৰিব ।

৫। চিনেমাত দুই এটা গীতে দৰ্শকক বাহিৰত গৈ চিগেৰেট হুঁপাৰ সুবিধা প্ৰদান কৰে ।

৬। নায়কৰ যদি ভায়েক আছে তেন্তে খাটাং হয় সি ভিলেইনৰ লগ লাগিব ন’হলে চিনেমাৰ আধাতে মৰিব । ভনিয়েক আছে যদিটো কথাই নাই হিৰোৰ মাৰ খাবলৈ ভিলেইনে এবাৰ হ’লেও কিডনেপ কৰি নি গুদামত ৰাখিবই ।

৭। ৰামু কাকা চিনেমাৰ আটাইতকৈ বিস্বাসযোগ্য চৰিত্ৰ তেঁওক কেতিয়াও সন্দেহ নকৰিব।

৮। ভিলেইনে নায়কৰ চৰ লাঠি ঘোচা খাইও মৰি যাব পিছে নায়কৰ গোটেই গা গুলিবিদ্ধ হৈ ফুটা চালনি হৈ গ’লেও বাছি যোৱাৰ সম্ভাবনা ১০০% কনফাৰ্ম থাকে, আৰু ডাক্টৰে যদি বচাৰ চাঞ্চ কম আছে বুলি কৈছে চিন্তা নকৰিব নায়কৰ মাকক বা প্ৰেয়সীক শিৱ মন্দিৰৰ ঘন্টা বজাবলৈ পঠি়য়াই দিয়ক ৷ শিৱ বা দূৰ্গাৰ মুৰ্তি বিভিন্ন এংগ'লত কঁপি ফুলটো সৰি পৰাৰ লগে লগে হস্পিতালত হিৰোৰ চেঞ্চ আহি যাব ।

৯। পুলিচ আহি পোৱাৰ আগতে হয় ভিলেইন চেটেপ, নহ'লে আধা মৰা অৱস্থাত "হেন্দচ আপ" বা " পুলিচ নে চাৰৌ তৰফ চে ঘেৰ ৰাখা হে " ডায়লগ কেইটা মাৰি মুখৰ খজুৱতি মাৰিবলৈ আহিব ৷ পুলিচে প্ৰকৃততে নায়কক ধন্যবাদ দিবৰ বাবেহে শেষ সময়ত আহি উপস্থিত হয় ।
১০৷ "কুট্টে মে তেৰে খুন পি জাউংগা" হিৰ'ৰ কমন ডাইলগ ৷

১১। ভাত খাই থকা চিন আছে যদি ১০০% কনফাৰ্ম আপোনাৰ ভুল হৈছে, আপুনি হিন্দী নহয় অসমীয়া চিনেমাহে চাই আছে ।

বিঃদ্ৰঃ
পেলেক চন বৰি বৰ্তমান ক'মাত আছে ৷ তামিল চিনেমাৰ ওপৰত ৰিচাৰ্চ কৰিব গৈ এই অৱস্থা বুলি ডক্টৰে জানিব দিছে ৷ যি চিনেমাত পিষ্টলৰ গুলিটোও হিৰ'ই হাতেৰে ৰখাব পাৰে, যিটো দেখি গতি সুত্ৰৰ আবিস্কাৰক নিউটনৰ আত্মাই এতিয়াও কবৰত ৰাতি ৰাতি বিনাই তেনেস্থলত পেলেক চন বৰি ক'মাত যোৱাতো সাধাৰন কথা ৷